Popular Bible Verses from Smart Guys 3

Share

“No tink if you know eryting, dass all you need. Mo betta if you go all out fo trus Da One In Charge. Wateva you do, tink bout God an wat he like you fo do, Den he goin make shua notting goin jam you up.

“No get big head cuz you tink you real smart An know wat fo do erytime. Mo betta you stay sked a Da One In Charge, Fo stay away from bad kine stuff.

“Go show erybody dat you get awesome respeck fo Da One In Charge. Wat you do wit all da tings you get, An how you give da Boss da bestes stuff, Da stuff you harves firs from all da food dat grow on top yoa land, All dat goin show you get respeck fo him. So den bumbye, Da One In Charge goin fill up yoa storage house Wit plenny food, An all da big barrels you get, No goin hold all da wine Da One In Charge goin give you.”

Make shua you stay tight wit yoa good frenz An show love an aloha erytime. Make shua peopo can trus you. You make lidat all da time, Dat make you look good, Jalike wen you put on one jewelry on yoa neck. Learn da Rules from God real good, Fo you no foget um an you keep um inside you. Cuz inside, az jalike one book An you stay write inside um.

I tell my boy, “No tink dass wase time Wen Da One In Charge tell you tings fo make you learn! No get wild Wen he presha you fo do da right ting! Cuz anybody dat Da One In Charge love, He goin put presha on dem fo teach dem, Jalike one faddah guy do Wen he get love an aloha fo his boy.”

Wen I talk to my boy, I tell um, “Da rules I stay teach you, Neva eva foget um. Da tings I stay tell you you gotta do, Learn um real good, So all dat goin stay inside you. Den bumbye you goin live long time, You goin get plenny year fo do plenny stuff, An eryting goin go good fo you.

Wen somebody get da smarts Fo know wat fo do erytime, An learn how fo undastan stuff, Dey can stay good inside! Wen you know wat fo do, Az mo betta den plenny silva! Wen you undastan stuff, Dat goin give you someting mo betta den plenny gold! Da kine worth mo plenny den jewel stones. All da odda tings dat you like fo real kine, No even come close, Dat kine smarts mo betta.

“Wen you gotta do someting fo help somebody, No hold back if you get da powa fo do um.

Da One In Charge, he know wat fo do erytime, An dass how come he make da world da right way. He wen put da sky wea he like Cuz he undastan da right way fo do um.