Popular Bible Verses from Smart Guys 16

Share

Eryting you do, turn um ova to Da One In Charge fo help you. Den all da tings you make plan fo do Goin come out okay.

Peopo make plan Fo how dey goin live. But Da One In Charge, he da One Make da real plan, wat dey goin do.

Wen you talk to peopo An make um feel real good inside, Dass jalike fresh honey. Taste sweet An make da body come good.

Peopo, dey make dea plan howeva dey tink, But da right words come from Da One In Charge.

If you can stay so notting bodda you, Az mo betta den be one guy dat can fight good. If you can come so notting bodda you wen you stay mad, Az mo betta den take ova one big town.

You ack big head, Den, you goin come wipe out. You tink high makamaka kine, Den, you goin fall down.

Erybody tink notting wrong Wit da way dey live. But Da One In Charge, he know eryting inside peopo, How come dey tink how dey tink, An he know if good o bad.

Anybody lissen real good To da guys dat know wat fo do erytime, Dey goin come out okay. Anybody stay trus Da One In Charge, Dey can stay good inside.

If you ony get litto bit stuffs, But you stay do da right ting, Dass mo betta den wen you make plenny money An no do wass right fo peopo.

Get some way dat look jalike az da right way fo all dem go, But bumbye dey goin end up inside da Mahke Peopo Place.

Da kine guy dat like jam up eryting, He make erybody like beef each odda. Da kine guy ony grumble an talk bad, He split up good frenz.