Popular Bible Verses from Romanos 1

Share

Bi cheto'eda' gua' diža' güen c̱he Jesucriston', ḻe xtižen' nsan' yeḻa' guac c̱he Diosen' cont beṉe' chesejḻe' c̱hen gata' yeḻa' mban c̱hegaque' toḻi tocaṉe. Nsan' yeḻa' guac len neto' beṉe' Israel, na' ḻecze len le'e bi nacle beṉe' Israel.

Na' diža' güen c̱he Jesucriston' chzejni'in chio' še beṉe' yesejnilaže' Jesucriston', Diosen' gone' ḻegaque' beṉe' güen, na' bi de bichle da' gac goncho cont gaccho beṉe' güen len ḻe'. Can' nyoj Xtiža' Diosen' žan: “Diosen' že' beṉe' chejnilaže' ḻe' naque' beṉe' güen len ḻe' na' gata' yeḻa' mban c̱he' toḻi tocaṉe.”

Bi chle'echo can' nac Diosen', na' bi chle'echo can' zoe' chnabi'e, perw ṉezecho de yeḻa' guac c̱he' can' bene' bx̱ie' yežlion', na' yogo' beṉac̱h chesele'ede' da' ca' ba bene'. Da'nan' bibi de da' yosode'e beṉac̱hen' yesene' bi zjaṉezde' še zoe'.

Ḻa'czḻa' zjaṉezde' zoa Diosen', bi chesonxene' ḻe', ṉeca cheso'e yeḻa' chox̱clen c̱he'. Xbab c̱hegaquen' bibi zacan' na' zjanc̱hoḻ yic̱hjlažda'ogüen' yeḻa' bi chejḻe' c̱hegaquen'.

Diosen' gwlejyic̱hje' ḻegaque' cont chesone' yeḻa' zto', ḻe ḻegaque' gosebejyic̱hje' diža' ḻi c̱he Diosen' na' chesejḻe'e c̱he da' güenḻaže'. Chesejnilaže' da' ca' ben Diosen' na' bi chesejnilaže' Dios ben' cheyaḻa' šejnilaže'cho na' gonxencho toḻi tocaṉe. Ca'czen' gacšca.

Diosen' zoe' yaban' na' ba blo'ede' beṉac̱hen' toḻi tocaṉe yesesaca'zi' yogo' beṉe' cbi chesejnilaže' ḻe' na' chesone' da' xiṉj. Na' da' chesone' da' xiṉjen' bi chesaclaže' yesombia' beṉe' yoble diža' ḻi c̱he Diosen'.

Da'nan' Diosen' gwlejyic̱hje' ḻegaque' cont chesone' yeḻa' zto' con da' žan ḻo' yic̱hjlažda'ogaque'. Can' chac, nita' no'ole beṉe' bich chesone' can' cheyaḻa' yeson no'olen', san cheseque'e ḻjež no'olgaque' cont chesone' len ḻegaque' da' bi cheyaḻa' yesone'. Na' nita' beṉe' byo beṉe' bitw chese'nde' yesenita'lene' no'ole, san chesezelaže' ḻjež beṉe' byogaque' nach cheseca'a ḻježe' cont chesone' yeḻa' zto'. Na' dan' ba chbiayi' cuerp c̱hegaquen', naquen castigw da' cheyaḻa' yesezi'e yeḻa' güen da' xiṉj c̱hen'. Bi chesaclaže' beṉac̱hen' yosozenague' c̱he Diosen', da'nan' ba gwlejyic̱hje' ḻegaque' len xbab mal c̱hegaquen'. Da'nan' nite' chesone' da' bi cheyaḻa' yesone'.

Chesene' zjanaque' beṉe' sina' perw chesone' xbab da' bibi zaca'. Chosozoe' Diosen' to šḻa'ale ḻa'czḻa' naque' ḻa'zelagüe' beṉe' zaca' na' zoe' toḻi tocaṉe. Na' gualaz ḻe', chesejnilaže' no ḻ gua'a ḻsaca' c̱he beṉac̱h beṉe' te c̱he, na' no ḻ gua'a ḻsaca' c̱he be zoa x̱il, c̱he be žia tap ṉi'a na'ba' na' c̱he no be x̱igüe'.