Popular Bible Verses from 2 Pedro 1

Share

Dan me se niꞌndaj ya̱ veꞌé vaa Yaꞌanj ne̱ niꞌndaj ya̱ sa̱ꞌ rá soꞌ, ne̱ cheꞌé dan canacúún ya̱ soꞌ man níꞌ canoco̱ꞌ níꞌ man soꞌ a. Ne̱ cheꞌé se neꞌen ya̱ níꞌ man soꞌ, ne̱ racuíj snucua̱j soꞌ man níꞌ ca̱yáán sa̱ꞌ níꞌ ga̱ soꞌ, ne̱ veꞌé canoco̱ꞌ níꞌ man soꞌ ado̱nj. Ne̱ cheꞌé dan cataꞌ tuꞌva soꞌ cheꞌé niꞌndaj ya̱ nij se lu̱j quiꞌya̱j ndoꞌo soꞌ ga̱ níꞌ, cheꞌé rej caꞌve̱e nani̱i̱ soj rihaan se chiꞌi̱i̱ nu̱u̱ nimán nij síí ma̱n rihaan chumii̱ nihánj, ne̱ ase vaa maꞌa̱n Yaꞌanj roꞌ, da̱nj ga̱a̱ soj a.

Ne̱ cheꞌé dan soj si̱j amán rá niꞌya̱j man Cristó me se ꞌo̱ naquiꞌya̱j cu̱u soj cheꞌé stucua̱nj Yaꞌanj, ne̱ naquiꞌya̱j sca̱ꞌ ndoꞌo soj nimán soj á. Ne̱ asa̱ꞌ guun sca̱ꞌ nimán soj, ga̱a ne̱ rquee̱ soj xca̱j soj cuentá sa̱ꞌ doj cheꞌé snana̱ Yaꞌanj á. Ne̱ asa̱ꞌ queneꞌen sa̱ꞌ soj snana̱ Yaꞌanj, ga̱a ne̱ te̱rquee̱ soj gu̱un soj síí tumé sa̱ꞌ man maꞌa̱n da̱j quiꞌya̱j maꞌa̱n soj á. Ne̱ asa̱ꞌ quisíj tumé sa̱ꞌ soj man maꞌa̱n soj, ga̱a ne̱ te̱rquee̱ soj gu̱un nucua̱j nimán soj rihaan sayuun á. Ne̱ asa̱ꞌ quisíj guun nucua̱j nimán soj rihaan sayuun, ga̱a ne̱ te̱rquee̱ soj quiꞌya̱j soj nda̱a vaa me rá Yaꞌanj quiꞌya̱j soj á. Ne̱ asa̱ꞌ quisíj nariꞌ soj quiꞌya̱j soj nda̱a vaa me rá Yaꞌanj, ga̱a ne̱ te̱rquee̱ soj cunu̱u niꞌya̱nj nimán soj á. Ne̱ asa̱ꞌ quisíj cunuu niꞌya̱nj nimán soj, ga̱a ne̱ te̱rquee̱ soj cunu̱u ꞌe̱e̱ rá soj ni̱ꞌyaj soj tuviꞌ soj á.

Dan me se sese doj a̱ doj a̱ nari̱ꞌ soj quiꞌya̱j soj nu̱ꞌ da̱nj da̱j a̱ güii, ga̱a ne̱ se̱ caꞌvee gu̱un soj síí niꞌyo̱n síí ne neꞌen quiꞌya̱j se‑su̱u̱n Yaꞌanj a̱ maꞌ. Tana̱nj sa̱ꞌ uxrá doj queneꞌe̱n soj man Jesucristó Si̱j ꞌNi̱j Raꞌa man níꞌ ado̱nj.

Cheꞌé dan me doj a̱ te̱rquee̱ ndoꞌo soj canoco̱ꞌ xraan soj man Yaꞌanj, tinu̱j, nocoj. Dan, ga̱a ne̱ queneꞌe̱n ya̱ soj se vaa nacúún Yaꞌanj man soj ne̱ narii Yaꞌanj man soj cavi̱i̱ sa̱ꞌ soj ga̱ soꞌ, ne̱ daj chiha̱a̱ míj se̱ quiriꞌ soj rihaan Yaꞌanj maꞌ.