Popular Bible Verses from Hebreos 11

Share

Pwihsi ziga gaapa luꞌh guelriachii stoꞌ naa siguhra zicaꞌha luꞌh nin cabweeza luꞌh, cun naannloh za luꞌh chuu tuhbi cohsa nin nagahdxi dxiinloh. Biahxinee Dxiohs laꞌh xtaada guldooꞌ raꞌ nuꞌh laasii gwachiistoꞌ raꞌ ba xchiꞌdxyi Ñiꞌh.

Pwihsi ayi nuu cuꞌnasaa luꞌh stoꞌ Dxiohs sidela ayi riachiistoꞌ luꞌh xchiꞌdxyi Ñiꞌh, laasii ziga chebiiga luꞌh loh Dxiohs nahpa chechiistoꞌ luꞌh nuu Dxiohs nee zudiꞌhi Ñiꞌh cohsa zaꞌca laꞌh raꞌ bwiinn raꞌ nin gadxiꞌhyi laꞌh Ñiꞌh.

Laasii nin riachiistoꞌ nuꞌh, naann nuꞌh bwiꞌhnnchaꞌyi Dxiohs dxibaaꞌ cun guidxyiyuh pur xchiꞌdxyi Ñiꞌh, laasii nin rachidiaꞌha raꞌ nuꞌh nnah guhcan loh nin ayi biinloh galohyi.

Pur guelriachiistoꞌ xteenn xchiꞌdxyi Dxiohs nin guyuuꞌ stoꞌ guehtu Abrahn, chin gudihdxyi Dxiohs laꞌh ba, bazoꞌbadxiahga ba xchiꞌdxyi Ñiꞌh biriaꞌh ba lahdxyi ba gwah ba nez hasta biaꞌhandxyiꞌdxyi Dxiohs gudiꞌhi Ñiꞌh guicaꞌha ba. Pwihsi biriaꞌh ba lahdxyi ba gunaꞌzu nehza ba zee ba nin ayi gaann ba caa chiꞌh gadzihn ba. Pwihsi laasii guyuuꞌ guelriachii xteenn xchiꞌdxyi Dxiohs stoꞌ guehtu Abrahn, niꞌchin guyuuꞌ ba ziga tuhbi bwiinnziitu loh yuh raꞌ nin guxeꞌhla Dxiohs laꞌh ba, guyuuꞌ raꞌ ba laꞌn yuuꞌ dxihdxi raꞌ, ziga gahca za bwiꞌhnn guehtu Isaac cun guehtu Jacobo, laasii nee loh raꞌ ba biaꞌhandxyiꞌdxyi Dxiohs gucaꞌha raꞌ ba yuh raꞌ chi

Nee pur gwachiistoꞌ guehtu Noeh dxyiꞌdxyi nin guñiꞌ Dxiohs loh ba, chin rahbi Ñiꞌh ziaaba ñihsadxiah nin gueꞌdu gwaꞌha raꞌ bwiinn, chiꞌchi bwiꞌhnn ba nin rahbi Dxiohs loh ba nee bidxyihbi za ba laasii naann ba ruzaꞌloh Dxiohs dxyiꞌdxyi nin rñiꞌ Ñiꞌh, niꞌchin bwiꞌhnnchaꞌyi ba tuhbi barcu rooꞌ tin ayi ñahchi raꞌ bwiinn lasaaꞌ ba. Laasii gwachiistoꞌ ba xchiꞌdxyi Dxiohs, niꞌchi baluuꞌyi ba balaaca nin ayi riachiistoꞌ raꞌ bwiinn guidxyiyuh dxyiꞌdxyi nin baluuꞌyi ba, niꞌchi gucaꞌha Noeh guelnabahan zaꞌca nin gwachiistoꞌ ba xchiꞌdxyi Dxiohs.

Ziꞌchi gahca za laꞌh Enoc pur ziga gwachiistoꞌ ba laꞌh Dxiohs, niꞌchin nin zeenee Dxiohs laꞌh ba llaaꞌndxibaaꞌ, nabahan ba ayi guhchi ba, pwihsi ayi ru badxeela raꞌ ba laꞌh Enoc laasii Dxiohs zeenee laꞌh ba llaaꞌndxibaaꞌ, nee loh Xchihtsi Dxiohs rñiꞌ galoh nin nagahdxi guzee ba llaaꞌndxibaaꞌ, guluuꞌnasaa ba stoꞌ Dxiohs.

Pur ziga gwachiistoꞌ guehtu Abel xchiꞌdxyi Dxiohs badiꞌhi guhn ba tuhbi guhn nez loh Ñiꞌh nin nazaꞌca ru loh guhn nin badiꞌhi bwihtsi ba nin biriaꞌhlah Caín, ya pur niꞌchin guñiꞌ Dxiohs naa guehtu Abel bwiinn zaꞌca ru. Nnah nicala laꞌh guehtu Abel guhchi ba, zeezahtiiꞌ zaꞌbi xchiꞌdxyi ba ziga gwachiistoꞌ ba xchiꞌdxyi Dxiohs.

Ziꞌchi za gohpa guehtu Sara guelriachiistoꞌ xchiꞌdxyi Dxiohs tin nicala guyuꞌxa ba nee gudiiꞌdxi ñuuꞌ lliiꞌn ba, per gucaꞌha ba guelrnabwaꞌ tin guyuuꞌ lliiꞌn ba laasii gwachiistoꞌ ba laꞌh Dxiohs nahpa bazaꞌloh Ñiꞌh xchiꞌdxyi Ñiꞌh nin biaꞌhannee Ñiꞌh laꞌh ba.

laasii laꞌh guehtu Abrahn guleeza ba tuhbi guihdxyi nin zohba dziꞌtsi, tuhbi guihdxyi nin guunnchaꞌyi Dxiohs nee nin cwachixchih Ñiꞌh.

ya gohpa za guehtu Moisehs guelriachiistoꞌ xteenn xchiꞌdxyi Dxiohs stoꞌ ba niꞌchin chin guhca ndxiꞌhw ba ayi gunnah ba ñiriaꞌlah ba lliiꞌn lliiꞌndxaꞌpa rrehyi Egiptu, sino que bwiꞌhnn ba lligaaba batiꞌdxilohnee ba laꞌh raꞌ xpwiinn Dxiohs guelrzaꞌcazii xlawaaꞌha ñahxinee ba guelnasaa raꞌ xteenn duhlda paaldaa si dxyih. Par laꞌh ba lasahca ru batiꞌdxiloh ba guelrzaꞌcazii ziga nin batiꞌdxiloh Jesucristu xlawaaꞌha ñicaꞌha ba guelnazaꞌca xteenn Egiptu laasii cabweeza si ba guelnazaꞌca nin gudiꞌhi Dxiohs laꞌh ba. Pwihsi pur guelriachiistoꞌ xteenn xchiꞌdxyi Dxiohs nin guyuuꞌ stoꞌ guehtu Moisehs, biriaꞌh ba loh guihdxyi Egiptu nee ayi bidxyihbi ba xquelnadxyiꞌchi rrehyi, gwazahnee dziꞌtsi ba ziga naa xigaaba ba ziga nin bwaꞌhaloh ba laꞌh Dxiohs nin ayi chyu gwaꞌha.

Pwihsi pur guelriachiistoꞌ xteenn Dxiohs nin guyuuꞌ stoꞌ guehtu Abrahn, niꞌchin chin badiꞌhi Ñiꞌh tuhbi dziꞌn nagahn laꞌh ba tin gwaꞌha Ñiꞌh xa guunn ba, gwanee ba laꞌh Isaac tuhbi lahta tin ñudiꞌhi ba laꞌh Isaac ziga tuhbi guhn loh Dxiohs. Pwihsi ayi biaa ba ñudiꞌhi ba laꞌh tuhbi dxiꞌh lliiꞌn ba chi guhn loh Dxiohs, nicala biaꞌhannee Dxiohs dxyiꞌdxyi laꞌh ba

ya pur guelriachiistoꞌ guehtu Rahab, tuhbi gunnaꞌh dxaaba, ayi guhchi ba chin guhchi raꞌ bwiinn nin ayi bazoꞌbadxiahga dxyiꞌdxyi laasii laꞌh ba bagachiꞌloh ba nee guluuꞌchaꞌyi ba laꞌh raꞌ bwiinn Israel nin zeegaldaꞌtsi xa naa guihdxyi chi.

Ya pur guelriachiistoꞌ xteenn xchiꞌdxyi Dxiohs gudiiꞌdxi bwiinn Israel galaayi ñihsadoꞌ nin laa ñisadoꞌ xñiaa ziga zi loh yuh bihdzi; ya chin guclaaꞌdzi raꞌ bwiinn Egiptu raꞌ ñuhnn ziꞌchi za, laꞌlagaꞌh gubiꞌhyi ñihsadoꞌ chi yihca raꞌ ba ya gwaaꞌñihsa raꞌ ba.

Ya pur guelriachiistoꞌ xteenn xchiꞌdxyi Dxiohs gurih barda dxiah xteenn guihdxyi Jericoh laasii galoh biahyi raꞌ ba gadiidxi leeꞌ dxiah chi loh gahdzi dxyih

Ya pur guelriachiistoꞌ xteenn xchiꞌdxyi Dxiohs nin guyuuꞌ stoꞌ Moisehs bwiꞌhnn ba lañih xteenn paascu, gunabwaꞌ ba baroꞌba raꞌ ba llarihn raꞌ lliꞌhyi tuhbigah rwaaꞌ yuuꞌ nin guyuuꞌ raꞌ bwiinn Israel raꞌ tin chin gudiiꞌdxi aanjla xteenn guelguhchi riꞌchi nin tuhbi lliiꞌngaꞌn galoh bwiinn Israel ayi xi gunnee ba.

Ziꞌchi za laꞌh guehtu Joseh guyuuꞌ za guelriachiistoꞌ xteenn Dxiohs stoꞌ ba chin ba naa gachi ba guñiꞌxgah ba zariaꞌh raꞌ bwiinn Israel loh guihdxyi Egiptu, guñiꞌ za ba xa nahpa gucaꞌtsi raꞌ ba laꞌh ba.

Ziꞌchi za laꞌh guehtu Jacobo guyuuꞌ za guelriachiistoꞌ xteenn xchiꞌdxyi Dxiohs stoꞌ ba chin laꞌh ba naa gachi bwiꞌhnntaaꞌyi ba yihca tuhbigah raꞌ lliiꞌn guehtu Joseh, chiꞌchi gunaꞌzu ba tuhbi yahga gaandxu tin guzuh chihpa ba guunn ba laꞌh Dxiohs.

Pwihsi ziꞌchi za laꞌh guehtu Isaac guyuuꞌ guelriachiistoꞌ xteenn xchiꞌdxyi Dxiohs stoꞌ ba niꞌchin bwiꞌhnntaaꞌyi ba yihca guehtu Jacobo cun guehtu Esaú, ya guñiꞌxgah ba xi niꞌca guunn tuhbigah raꞌ bi.