Popular Bible Verses from 1 Pedro 2

Share

Laꞌhtu naa tu tuhbi cwaꞌh bwiinn raꞌ nin gulii Dxiohs, ya tuhbigah tu naa tu bixohza nin naa ziga rrehyi xteenn Dxiohs. Laꞌhtu naa tu tuhbi bwiinn nayaa, tuhbi bwiinn zaꞌca, nin naa raꞌ xpwiinn Ñiꞌh. Pwihsi gulii Ñiꞌh laꞌhtu tin guluuꞌyi tu guelnazaꞌca duxa nin bwiꞌhnn Dxiohs nin gudihdxyi laꞌhtu chin guyuuꞌ tu loh neziuh nacahyi xteenn guidxyiyuh riiꞌ tin biuuꞌ tu loh xneziuh ñaꞌñih xteenn Dxiohs.

Batiꞌdxiloh Jesucristu guelrzaꞌcazii guhchi Ñiꞌh loh cruhzi tin gudxihlli Ñiꞌh xcweenta xtuhlda raꞌ nuꞌh, tin guibahan zaꞌca raꞌ nuꞌh loh xneziuh Dxiohs. Laꞌh Ñiꞌh bidxeeldxyihdxyi tihxi Ñiꞌh tin biaaca tu laꞌhtu, laasii laꞌhtu desde galohyi guhca tu ziga zi lliꞌhyi nin bizaꞌbi raꞌ, per nnah laꞌhtu biuuꞌnehza loh Jesucristu, tin naa Ñiꞌh xbaxtohr loh tu, nee laꞌh Ñiꞌh naa Ñiꞌh rahpa xaalma tu.

Laꞌhtu galohyi ayi chyu naa tu nez loh Dxiohs, per nnah naa tu xpwiinn guihdxyi Dxiohs. Cadxyih ayi chyu balahsa stoꞌ ñiꞌh laꞌhtu, per nnah laꞌh Dxiohs balahsa stoꞌ Ñiꞌh laꞌhtu.

Mahzi chaꞌyi ziga zi biñiꞌn nin gueꞌdu rahlaa, rdxaꞌgastoꞌ raꞌ bi lehchi; ziꞌchi gahca za gulguiꞌhnn pur guidxaꞌga stoꞌ tu xchiꞌdxyi Dxiohs tin guchiooꞌhon laꞌhtu loh guelnabahan nacuubi nin nahpa tu ya pur laꞌhan taꞌh tu loh duhlda.

Pwihsi bwiitsi raꞌn nin nadziiꞌhi raꞌn; nabahan tu loh guidxyiyuh riiꞌ ziga bwiinn ziitu raꞌ, ayi gusaaꞌn tu xa chuꞌtee ziga lligaaba dxaaba raꞌ xteenn duhlda nin nuu loh guidxyiyuh nin rusiahchi stoꞌ bwiinn nin ruhnn rbweꞌhe stoꞌ raꞌ loh xneziuh Dxiohs. Gulguibahan zaꞌca nez loh raꞌ bwiinn raꞌ nin ayi naa raꞌ bwiinn Israel raꞌ. Nicala nnah rñiꞌ raꞌ ba dxyiꞌdxyinah pur laꞌhtu ziga bwiinn nin ruhnn cohsa dxaaba, per ya chin gwaꞌha raꞌ ba xcweenta dziꞌn zaꞌca nin ruhnn tu, chiꞌchi ziñiꞌ zaꞌca raꞌ ba pur laꞌh Dxiohs chin gadzihn dxyih guunn Dxiohs guelguxchisi xcweenta cada tuhbigah raꞌ bwiinn.

Pwihsi neezaa laꞌhtu, ziga zi dxiah raꞌ nin nahpa guelnabahan; gulgasaaꞌn guunnxtsiꞌn Dxiohs laꞌhtu, tin guunn Ñiꞌh laꞌhtu tuhbi guidoꞌ hasta cweeza Spíritu Ñiꞌh, tin gaca tu xpixohza Dxiohs, nin nayaa rahpa laꞌn lastoꞌ raꞌ ñiꞌh. Laasii naa tu tuhsi cun Jesucristu zibwihdxyi-zinaaba tu loh Dxiohs cun guiñiꞌ zaꞌca za tu pur xcweenta Ñiꞌh, ya dee raꞌ naa ziga tuhbi guhn nin rtahn desde laꞌn lastoꞌ tu nee naa raꞌn nin xclaaꞌdzi Dxiohs

Pwihsi niꞌchin gulgasaaꞌn garaaloh raꞌ cohsa dxaaba raꞌ nin nuu loh guidxyiyuh; ayi gusaguiꞌhi tu lasaaꞌ tu, ayi guiñiꞌ xihn tu loh lasaaꞌ tu, ayi chuudxih tu xixteenn lasaaꞌ tu; nee cun ziahan ru cohsa dxaaba raꞌ ayi guunn tu.

Gulchebiiga loh Jesucristu, nin naa ziga zi tuhbi dxiah nin nahpa guelnabahan nin guleꞌhecaa raꞌ bwiinn raꞌ ya para laꞌh Dxiohs naa dxiah chi tuhbi dxiah nin gulii Ñiꞌh nee lasahca duxan para laꞌh Ñiꞌh.

Gulgahca ziga zi bwiinn nin ayi ruzoꞌbadxiahga xlehyi Moisehs, per ayi ziga bwiinn raꞌ nin zuu bariaꞌh loh xlehyi Moisehs para guunn raꞌ ba tuhbi cohsa dxaaba, sino que gulgahca ziga zi tuhbi bwiinn nin chuꞌtiiꞌ nez loh Dxiohs para tuꞌpazi.

Laasii Dxiohs xclaaꞌdzi Ñiꞌh guunn tu cohsa zaꞌca, tin ziꞌchi ayi nuu xa guidxeela raꞌ nin naa raꞌ bwiinn naguꞌñiꞌyah raꞌ cun nin naa bwiinn mbah raꞌ xa pur guiñiꞌ raꞌ ba xilla dxyiꞌdxyi dxaaba pur laꞌhtu.