Popular Bible Verses from Deuteronomio 30

Share

Wii atum ainatirmin iwáku pujustasrumek wakerarum, atsa jinattsarmek wakerarum, tura waittsuk pujustasrumek wakerarum, atsa waittsatsarmek wakerarum nu etegkatarma, tusan tajarme nu metek uminkatta nunaka nayaimpin nugkajai shuara numamtuk anaisan antuinai tajai. Antsu atumsha, tura atumi uchiri ainajaisha iwáku pujustasan wakerajai tusarum titarma. Yuus anetarma. Nigki umirkatarma. Eme anentsa iiyakrum ima nijaig irutkau pujustarma. Niyaiti pujuta sukartinka tumau asa ina uuntri Abrahaman, Isaacan tura Jacobon nu ainan nugkan nekas susatnaitjarme tusa anajmatawa nui pujakrumsha nukap uwí pujustin ainarme”, tusa Moisés ni shuar ainan tinaiti.

Wii yamai Yuus anetarma tusan tajarme. Tumakrum chicham umiktarma tusa ni turamna nu metek umirkatarma. Nu tumakrumnaka Yuus pegkernum yainmaktinaitrume. Turutma asamtai atum nugka jukittarme nui pujakrumsha, nukap uwí pujutnaitrume, tura shir nukap pampagtinaitrume.

Junasha tajarme: “Iwáku pujustasrumek wakerarum, atsa jinattsarmek wakerarum tura waittsuk pujustasrumek wakerarum, atsa waittsatsarmek wakerarum nu yamai etegkatarma.

Turasha chicham umiktin aina juka yupichu ainawai. Tura atumka chicham umiktin aina nuka shir nekarme. Tura nu pachisrumsha atumka tuke chicharme. Tura atumka nuka kajinmattsuk tuke aneakuk chicham umiktinka nekau asarum ashi umimainaitrume.

Ina Yuusri, atumin tura atumi uchiri artina nujaimak tunau takatan inaimamtikramsatnaitrume. Nuna turutmamtaigka atum tura atumi uchiri ainajaimak ina Yuusri, ima nigki enentaimtusrum umirkatarma. Nu tumakrumka nukap uwí pujustin ainarme.

Nu tumakrumin atum takamunam pegkernum yainmaktinaitrume. Tura nukap uchirmakarti, vacari ainasha nukap uchirmakarti, arake ainasha tumasag pegker nerekarti, tusa Yuus pegkernum yainmaktinaitrume. Yaunchuk atumi uuntri ainan shir enentaimtu jakua turusag, atumnasha Yuus shir enentaimturmastinaitrume.

Turasha nu metek umitsuk chikich yuus aina eme anentsa iiyakrum tikishmatra emematkurmeka, jinatin ainarme tusan ujajrume. Atum entsa Jordán amain katigkrum nugka jukittarme nuigka nukap uwíka pujuschatin ainarme.

Chicham umiktinan wii yamai atumin amajrum nunaka shir iturchatnaka, tura atum nekachminunka amatsjarme.

Chicham umiktin aarmauwa nuka nayaimpinmagka atsui, antsu nayaimpinam akai chichakrum: Nayaimpinam waka chicham umiktinan juki itaa ju umiktarma, tusa ina ujatmamainka atsawai tusarum tumain ainarme.

Nuiyasha nayants amain katigka atsui, antsu nayants amain akai chichakrum: Nayants amain katig chicham umiktinan juki itaa ju umiktarma tusa ujatmamainka atsawai tusarum tumain ainarme.