Popular Bible Verses from Mateus 24

Share

Marĩ iwasédé hã da te 're 'manharĩ za'ẽtẽ za'ra mono wa, te za ni'wam norĩ wi isimizawizé hã tiwi ai'utõrĩ za'ra. Tane nherẽ, ni'wa hã ro i'rãsutuzéb u siptete sina ĩ'ãma 're hâimana u'âsi mono wamhã, ta hã te za tinho'reptuzé hã sina uwaimra.

'Re ihâimana u'âsi mono, da'ãma 're isib'a'uwẽ mono zé wasu'u iwẽ uptabi hã, ĩzazei'wa norĩ hã daro mono bâ te za te te dama 're wasu'u za'ra, dawamri mono bâ, da te oto wapari za'ra da. Tawap si te za oto tirob'rãsutu za.

'Re aipahi za'ra wa'aba mono tõ, 're dasi'wapé za'ra mono wa, da te dasina 're iropupu'u za'ra mono zé hã, 're wapari za'ra wa'aba mono wamhã, duré dasi'wapéi wasu'u ma zama. Uburé ã norĩ hã te za tô 're wairébé. Tane nherẽ, zahadu rob'rãsutu õ di za.

Dawamri mono bâ te za 're dasi'wapé za'ra. Ti'ai wa'õtõ nho'õmo 're, roti'wa norĩ hã te za ti'ai wa'õtõ nho'õmo amoi u roti'wa norĩ hã te te 're 'wapé za'ra. Darob ahâ na te za mrab zô dawi 're rowaptâ'â za'ra. Duré nima niwĩmhã ti'ai popo hã te za 're wairébé. Ã norĩ hã robzépata nhana'rada, pi'õi ãma iwasã hã 're isépu'u na'rata za'ra mono ne.

Hâiwa duré ti'ai me, te za ai'utõrĩ zahuré. Tane nherẽ, ĩmreme hã niwa si'utõrĩ waihu'u õ di za.

E marĩ wa. Da'ahâ na te za wa hã newa 're dasiwasu'u za'ra, ãne: “Wa hã 'Re ihâimana u'âsi mono te te ĩpisudu, Danho'reptui'wa da!” Ãne wamhã, da'ahâ uptabi na te za ta norĩ hã te te dama 're rob'rãmi za'ra.

— Taha parimhã dazazéb 're, te za da te 're aséme 'wa, da te aima 're rob'manharĩ wasété za'ra wa'aba mono da, duré da te 're asimroi wa'aba mono da. Uburé na, te za da te 're ai'ruiwapari za'ẽtẽ za'ra wa'wa, ĩzazei'wa 're anomro aba mono wa. Taha wahu mono 'remhã, da'ahâ na te za da te 're ĩzazei utõrĩ za'ra. 'Râwim nherẽ, te za duré 're dasihâiba za'ré za'ra. Dasi'ruiwapari hã te za duré 're hâimana. Tawamhã ahâ na te za senai'õ na 'Re ihâimana u'âsi mono zadawa 'mahârâ'wa norĩ hã sihâi'ré za'ra. Ta norĩ hã te za da'ahâ na dama rob'rãmi za'ra.

Tawamhã Zezusi hã ma tãma waihu'u za'ra, ãne: — Ma'ãpé, ãma 're pibui pese za'ra wa'aba mono, ni'wa hã te te aima rob'rãmi za'ra wa'aba tõ da.

Tahawa, duré a norĩ wa'aba zama 're asõpré u'âsi aba mono. E marĩ wa. Ti'ai ãma Dasiré Ipodo hã te za wei mo, bâdâ, sô i'asimipari za'ra wa'aba õ zém na.

Tahawa, ma'ãpé 're asõpré u'âsi aba mono, waihu'u za'ra wa'aba õ wa, bâdâ Asib'apito za'ra wa'wa hã apâ za we imorĩzé hã.

Tawamhã Zezusi hã ma duré tãma waihu'u siromo za'ra, ãne: — Ãne hã iromhâimana mono zéb da hã, ni'wa bâdâ hã te te waihu'u õ di, duré bâtâ pibuzé hã. Hâiwa hawi romhuri'wa norĩ zama te te duré waihu'u za'ra õ di, duré I'ra zama. Imama si te te waihu'u pese di.

E marĩ wa. Senai õ na 'Re ihâimana u'âsi mono zadawa 'mahârâ'wa norĩ hã te za sihâi'ré za'ra, duré senai õ danho'reptui'wa norĩ hã, marĩ dama i'manharĩ waihu'u'õ, za te te 're i'manharĩ za'ra mono hã, duré marĩ, za te te dama 're irowẽ zani za'ra mono zama, te te dama 're rob'rãmi za'ra mono da, duré wapu wamhã, 'Re ihâimana u'âsi mono te te sima ipisutu za'ra norĩ ma zama, te te rob'rãmi za'ra da.

Noé 're hâimana mono ré, 're iromhâimana mono zém ne, te za tiromhâiba, Ti'ai ãma Dasiré Ipodo apâ we imorĩzéb u hã. Â pusi mono wana ré, ma tô 're dasaihuri. Te duré da te 're âhuri. Aibâ norĩ duré pi'õ norĩ hã ma tô si'ãma 're mro za'ra, Noé hã uba're wa, isébrézéb u. Tane nherẽ, da te rosa'rese za'ra õ di, i'âpusi mono zéb u hã. Ta hã ma tô uburé da'uprosi. Tane te za duré tiromhâiba, Ti'ai ãma Dasiré Ipodo hã apâ we imorĩzéb u hã.