Popular Bible Verses from Lucas 3

Share

Tawamhã Zuwã Batista hã, â dawabzuri, da te 'manharĩ za'ra ré, ma tô Zezusihi ma duré 'manha. Zezusi hã te te rowaptẽrẽ ré, ma tô hâiwa hã si'ridawa. Duré 'Re ihâimana u'âsi mono Pẽ'ẽzani hã ma tô we itẽme si'ra isõ'õmoi baba, utu'u ne. Tawamhã hâiwa hawi damreme hã te we tinha, ãne: — A hã ĩ'ra, ĩma i'asawi uptabi. Rowẽ za'ẽne hã te ĩma 're isõmri mo.

Tane nherẽ, Zuwã hã ma tô ãne dama siwasu'u: — Wa hã, â dawabzuri hã wa tô â na si te aima 're a'manharĩ 'wa. Tane nherẽ, te za wei wi za oto, ni'wa hã ĩnhipai u ipire uptabi hã. Tahawa wa hã e ĩwẽ bâ, ipara'uza wasisizé te tãma iwasihu da hã. Ta hã te za te te 're ai'ahâiba upsõi wa'wa 'Re ihâimana u'âsi mono Pẽ'ẽzani na, duré unhama na.

Ma'ãpé, marĩ hã 'manharĩ za'ra wa'aba, asihâi'ré za'ra wa'aba da, aiwasété na asisãmri za'ra wa'aba wa, i'asi'ruiwapari za'ra wa'aba na hã. Duré asima 're nharĩ za'ra wa'aba mono tõ, ãne hã: “Wa norĩ hã Abra'ãhã nhihudu.” E marĩ wa. Tô sena wa za ãne hã aima waihu'u za'ra wa'wa. 'Re ihâimana u'âsi mono hã, ã hã ẽtẽ nherẽ, te te ãma saprĩ waihu'u pese za'ra di, Abra'ãhã nhihudu na 're hâimana za'ra mono da hã.

Hâtâra hã te oto mapa, wede norĩ hã te te anhihâri da, isari hawi. Uburé rowede, 're i'rãi wẽ za'ra mono õ norĩ hã te za da te 're sihâri za'ra, unhama u da te 're sãmra mono da.

Ãne hã ma tô tiromhâiba, 'Re ihâimana u'âsi mono zadawa 'mahârâ'wa Izaias hã te te ãma irob'ui'érézéb zarina, ãne: “Ni'wa hã te hârâ 'rãihâ na dama rob'mahâ, rop si 're irosa'wari mono ãma: Sa'ra pese aba mono bâdâdi hã, Uburé Danhib'apito ma. Imana 'rãmi bâdâdi hã awa'awi sô sa'ra aba mono! Uburé sa'a wa'wa rob'rehâ norĩ hã, te za asiwi i'masisi aba mo, ti'a na. Duré uburé sa'a norĩ hã, duré ẽtẽ 'rãihâ norĩ hã te za aiwap si asiwi iromhâpâ aba mo. Bâdâdi nhi'oto norĩ hã imana'rãmi te za awa'awi da, isa'ra wa'aba mo. Duré bâdâdi na ab're norĩ hã te za isitob za'ra wa'aba mo. Tawamhã uburé te za 'madâ'â za'ra ni, 'Re ihâimana u'âsi mono hawi Danho'reptuzé hã.”