Popular Bible Verses from Ezodu 34

Share

Tawamhã Mozésihi nho're te te oto ro'razâri wamhã, ma tô mreme 'rãihâ na tinha ãne: — Wa hã Uburé Danhib'apito, 'Re ihâimana u'âsi mono! Wa hã da'ãma 're ĩsiwãrĩ wẽ mono 'wa, duré da'ãma 're ĩpẽ'ẽzé mono 'wa. Dazada hã 're ĩnhiti'ru su'u mono õ di. Duré dama ĩ'umnhasizé, ĩnhimizawizé me hã sa'ẽtẽ uptabi zahuré di. Tahawa, danhihudu dasitébré mono sidâpâsi wa õne u'â ĩnhimiropisutuzém na hã te tãma ãma 're a'uwaimrami. Duré marĩ iwasédé da te 're i'manharĩ za'ra mono zém na hã, duré 're idawasété za'ra mono zém na hã te da'ãma 're a'madâ'â mono õ di, nima norĩ ãma hã. Tane nherẽ, damama tiwasédé te te 're i'manharĩ za'ra mono u'âbâmhã i'ra norĩ ma hã, isihudu norĩ ma hã, isihudu 'ra norĩ ma hã, duré isihudu 'ra 'ra norĩ ma hã, ĩnhimihâzé hã te tãma 're ba'a waihu'u za'ra mono õ di.

— Ihâiba'õ ãma hã 're aiwata za'ra wa'aba mono õ di za. E marĩ wa. Wa hã Uburé Danhib'apito 'râwi 're ĩsisisi mono hã ãne: Aimawi ihâiba'õ norĩ ãma dawatazéb zarina 're ĩnhiti'rui pusi mono. Tahawa wa aima ĩsi'ru za'ra wa'wa, ĩ'ãma si 're aiwata za'ra wa'aba mono da.

Tawamhã Uburé Danhib'apito, Mozésihi ma te tinha ãne: — Asib'a'uwẽ norĩ me, wa za oto wasisaze za'ra zé hã wasiwi 'manharĩ ni. Isõ'a za'ra hã niwa uburé daro mono bâ 're idahâimana za'ra mono norĩ ma, te i'manharĩ'õ, wa za marĩ ipire iwaihu'u'õ hã tãma 'manharĩ za'ra. Tawamhã uburé te za wa hã Uburé Danhib'apito ĩnhimirob'manharĩzé dama iwaihu'u'õ hã 'madâ'â za'ra.