Popular Bible Verses from Josué 1

Share

Noqami TAYTA DIOSNIKI kaykä. Maypa aywaptikipis yanapänäpaq qamwanmi imaypis kaykäshaq. Sayno nikaptïqa ama mansariysu ni qelanaysu>>.

Say qelqaraykaq leykunata imaypis ama qonqankisu. Saypa trukanqa paqasta junaqta yarpachakunki lapanta cumplinaykipaq. Sayno cumpliptikimi lapan rurashqaykikunapis ali kanqa.

Yapaypis nïmi: Ama mansariysu ni qelanaysu. Sirvimaqnï Moisés yachasishushqayki leykunata mana qonqaypa cumplinki. Lapanta cumpliptikiqa ima rurashqaykichöpis yanapäshaykimi.

Moisésta yanapashqänölami qamtapis mana kachaypa yanapäshayki. Saymi guërracho pipis ichipäyäshunkipaqsu.

<<Qammi Israel runakunata aypunki unay ayllunkunata promitishqä nacionta herenciankuna kananpaq. Sayno kaykaptinqa ama qelanaysu ni mansariysu.

Moisésta promitishqänölami maymanpis chäyashqayki kaqqa qamkunapaq kanqa.

<<Sirvimaqnï Moisés wanukushnami. Saymi Israel runakunata pushar Jordán mayuta simpasishpayki promitishqä nacionman chäsinki.

TAYTA DIOSPA sirviqnin Moiséspa yanapaqninmi Numpa surin Josué karqan. Moisés wanuykuptinnami Josuéta TAYTA DIOS nirqan

Chaskiyänaykipaq kaq nación kanqa sunyaq jirkapita qalaykur Líbanucho kaykaq jalqakunayaqmi. Saynöpis kanqa Éufrates mayupita qalaykur Mediterráneo Lamaryaqmi. Say nacionchömi heteo runakunapis taykäyan.

Nishqaykikunata mana cäsukuq kaqtaqa wanusiyäshaq. Sayno kaykaptinqa ama mansariysu ni qelanaysu>>.

<<Intëru campamentupa aywar runakunata niyay: <Mirkapaykikunata kamarikuyay. Kananpita kimsa junaqtami Jordán mayuta simpashun TAYTA DIOSNINSI promitimashqansi nacionta chaskinansipaq> >>.