Popular Bible Verses from Romanos 1

Share

Maija'quë huaso coca quëaye yë'ëre huajëya'ye nëiñe pa̱ji. ¿Maija'quë tutu quë'i cocarepa me yë'ëre huajëya'ye nëico'ni? Si'aohua'ire i̱te sehuocohua'ire huaso ja̱'ñe a'ë, judío pa̱ire cui'ne judío pa̱i peocohua'ireje̱.

Ja̱je pa'ina, necaire paye pa'iji cuasa do'ire Maija'quëpi nuñerepa pa'icohua'ire neñere quëaji, de'o cocapi: “Nuñerepa pa'iquë cato, Maija'quëpi necaire paye pa'iji cuasayepi pasipi” caji tsoe toyase'e.

Si'aye iye yeja pa'iye i̱pi de'huapi. I̱ de'huani pa'i macapi huëoni i̱ nese'ere ñajë Maija'quë pa'iye asayë, i̱te ñama'pë pa'inije. Ja̱je pa'ina, Maija'quë tutu quë'ipi cui'ne ti pani huesëquë pa'iye asajëta'a de'oye yo'oye pa̱si do'ire, ca de'huani jëa ti̱'añe peoji, ja̱ohua'i.

Ja̱je Maija'quë pa'iye asacohua'ipi Maija'quëre papi cajë i̱te oiye pa̱huë. Cui'ne yequeje̱ de'oquëre papi caye pa̱huë. Coa ai jerepa yeque ti do'i peoyere cuasahuë. Cui'ne i̱ohua'i huesë joñoapi nea hue̱'ñana ne huesëhuë, co'a joñoa hue'e do'ire.

Nuñerepa Maija'quë cocare asaye yëma'pë coa ai jerepa cosoyere asahuë. Cui'ne ja̱je yo'ojë Maija'quë de'huasi co'amañare se̱i'ë, de'oquëre pa'ë cajë. Maija'quëre pare se̱ma'pë cui'ne Maija'quëre pa'ë caye pa̱huë. Maija'quë cato ti de'oquëre pa'ë caye pa'iji, si'anë. Ja̱je pa'ija̱quë.

I̱ohua'i co'aye yo'oyepi Maija'quë coca ye'yayere sa̱ñope yo'oyë. Ja̱je yo'osicohua'ire Maija'quëpi ma'tëmore papi i̱ohua'i yo'osi do'i co'ayere papi sa̱i ja̱'ñe jëjo dao ja̱'ñere i̱ñopi, maire.

Ja̱je pa'ina, Maija'quëpi je̱ocopi, co'aye si'sire yëcohua'ini coequë. Ja̱je pa'ina, nomiohua'ije̱ Maija'quë cua̱ñese'e je̱oni sa̱'ñe nomiohua'ija̱'a ë̱mëre yo'oyeje̱ yo'ohuë, si'si. Cui'ne ja̱je ë̱mëohua'ije̱ nomiohua'ire yo'oye je̱oni sa̱'ñe ë̱mëohua'ija̱'a yo'ohuë. Ë̲mëohua'ipi huajëya'ye yequë ë̱mëohua'ini yo'o do'ire i̱ohua'i ca̱pë̱api ai yo'oyë, i̱ohua'i co'aye yo'o do'ire sa̱i cua̱ñojë. Ja̱je pa'ina, i̱ohua'ipi Maija'quëre asaye coeye sëte, i̱je i̱ohua'ire je̱ocopi, joyo huesëohua'i pa'ijë i̱ohua'i yëyeje̱ co'ayere pa'ija̱jë, caquë.

Ja̱je pa'ina, ta̱'ñe pa'iohua'i a'ë cacohua'ita'a coa ai jerepa huesëohua'i pa'iyë. Maija'quë de'oquërepa pa'iquëta'are ti̱ñere se̱ñë, ju̱'icohua'ije̱ pa'iohua'ire de'huase'ere, pa̱ije pa'ire, pi̱'aje pa'ire, nëicohua'ije̱ pa'ire cui'ne a̱ñaje pa'ire de'huase'ere.