Popular Bible Verses from Filipenses 2

Share

Pejihe jate rũi ti pejapyaka a'ero. Tapenhimboheteteheuhui ti pejikovo. Nahã po pe'ji ojipe'g̃a mombe'gwovo hamo: “Ji hohe ko g̃a ndekoi,” pe'ji penhimbohetee'yma. Penhimimbotarimova'ea rehe jate rũi ti peko. Ojipe'g̃a nemimbotarimova'ea rehe ti peko no g̃a nderekokatuavo.

Jesus Cristo'ga reaporog̃ita javijitehe po ti pendeaporog̃ita toko hamo.

Jesus Cristo'ga ko Tupana'ga'javijiteheva'ero oko po rimba'e. Emo ga nde'iahai Tupana'ga pe: “Avuirama ti ji rekoi nde javijitehe huvihavuhuhetero nehẽ,” ga nde'i. G̃wemimbotarimo ga opohi gwuvihavuhuhetea hugwi. Okoteheve'g̃a'java'ero ga nhimongoi. A'ero ga ari yvyakotyve'g̃a ja raikwehe. Akwaimbae'g̃a javijitehe ga rekoi a'ero. Igwete ga nhimongotehei a okove'ỹ g̃wemimbotarimova'ea rehe. Tupana'ga nhi'ig̃a rehe jate ga rekoi avuirama. A'ero ga manoi ganhi'ig̃a rupi okovo. Yva rehe vĩa reki ga omano raikwehe.

A'ereki Tupana'ga pe mbojirokwaruka pe mongopotaruka g̃wemimbotarimova'ea rehe jipi.

Cristo'ga nhimongotehero g̃waramo Tupana'ga ga mongoi huvihavuhuhetero jara'g̃a hohe pa. Tupana'ga ga mongoi nhandepojykaharetero tombohete hete ti g̃a Jesus Cristo'ga javo. Yvagipeve'g̃a po ti ga mbohetei nehẽ. Yvyakotyve'g̃a po ti ga mbohetei nehẽ. Yvyagwyripeve'g̃a po ti ga mbohetei nehẽ no. E'i pa po ti g̃a nehẽ: “Jesus Cristo'ga ko nhandepojykaharete'ga,” e po ti g̃a nehẽ. O'erame po ti g̃a nhanderuvete'ga mbohetei nehẽ Tupana'ga.

Tapenhonhi'ig̃ayvaruhui ti penhiroyrõe'yma pejogwerekovo. Nahã po pe peko hamo tokwaha ti g̃a pendekokatua nehẽ. Tapekote'varuhui'i'i ti Tupana'ga ra'yramo. Nhanderyapehava yvagipeva'ea jukwaha g̃wendy'javame ypytunahiva pyteri pe. Na jitehe pe ukwahavamo pejikokaturame heaporog̃itate'varuhuve'g̃a pyteri pe okote'varuhuve'g̃a pyteri pe.

Nhiirũ, pe ji rendu katu jipi. Pejirokwa hete ti a'ero pejikopaheteavo Tupana'ga rehe. Nahã pe ndekoi ji ruvame pe pyri ikwehe. Ag̃wamo kaitu ji ruve'ymame pejipyri pejirokwa pejikovo hete Tupana'ga rehe.