Popular Bible Verses from Ephesians 5

Share

Soo Te Naa unu te soobedyana pummesoo dooamu-wa'ne te matugu. Tamme sakwa oo-wa'nesoo. Tamme sakwa unu nanasoobedya ka Te Pabe'e tamme unu soobedya-kwa'ne. Oosoo puu tamme-koobatoo nabatsapu. Soo Te Naa besa soonamme ka Te Pabe'e tamme-koobatoo nabatsapu yise te tuma'emukwana oo-koobatoo soomu'wa.

Tamme sakwa unu sokwama manekese, besa kaaheno ooosapa maneno. Tamme sakwa ooosapa besa ka tamme tu sootuhipu-ma maneno. Mu numu meno'otu ewa suda tuma'emukwa, umu ka gi sosokwamana. Tamme sakwa gi umu-wa'ne manepana.

Tamme sakwa gi baagoepana, soo nahebedu kadoo'oo te mayugwekwu. Soo Te Naa Besa Pooha sakwa te tunemadabueku. Tamme sakwa besa nanadyadooena, nanesootuhi hoobea nananekwuhukuna. Te soonamme-kwikoo puusoo hoobeadoona. Tamme sakwa too ka Te Pabe'e-matoo tunekwuhu. Ooosapa tamme sakwa nanesootuhi ka Te Naa-matoo, mee unnena, “U besakoo ne sootuhipu ka Ne Pabe'e Jesus-koobatoo. U tubetse besa'yoo.”

Tamme sakwa unu sokwamana ka Te Pabe'e tamme tunetammakuna nakasopedakwatoo.

Mu nanana sakwa ka tu nonodukawamu besa soobedya ka Te Pabe'e tamme tunaka'oedyukudu unu soobedya-kwa'ne. Oosoo unu te soobedyana tamme-koobatoo nabatsa, O'no soo Te Naa te tuma'emukwana soomu'wakwu. Besa tu nayadooa-ma ka baa-wi te matzakase, tamme gi totsabu ka manekwu.

Tamme-notu toganopunne uga ka Te Naa gi nasopedakwatoo, tamme togaba-witu-wa'ne'yoo. Meno'o yise tamme oetu tabuakute, o tamme ka Te Naa-witu nakasopedakwadoose. Tamme sakwa Te Naa dooamu-kwa'ne besa oetu nakasopedakwadoo.

Tamme sakwa punno'o nananakabetsea tamme ka Te Pabe'e nakabetseana.

Momoko'ne sakwa pummesoo koomamu nakabetsea Te Pabe'e-koobatoo.

No'yoona nanana sakwa pummesoo nodukwa besa soobedya ka tammesoo nasoobedya-kwa'ne, no'yoona momoko'ne sakwa pummesoo koomamu nakabetsea.

Mee nabotugu, “Soo nana puu tu naanapua'amu-baa'yoona mea, oosoo tu nodukwa-baa'yookwuse. Umu waha'yoo numu sumu'yoosoo numu-wa'ne'yookwu.”

Mu gi tunaka'oedyukudu tooe how tooe manakwe, umu ka gi Te Naa-witu nakasopedakwadoona. Tamme sakwa gi umu-ma tzabepana. Umuoo sakwa mu neda.