Popular Bible Verses from Esusën Uan ismiaid 12

Share

Nëbi umbi isac Mayan Icsa Satanasën Esus tantiaquido chieshtometiapimbo iquec. Obecabimbuecquid yec abided cuidadec uënësaidën intaquën chieshtotiapimbocquid icmendac. Cuessunnenu, caqui: Esusën iuambo nebi, queshun uënëste dacuëdënenquio icquin abi chuibanendac.

Adnubien Nuquin Papa yacnouësh cumapenec onquequin naden chuiposh: Nëbi Nuquin Papan nadatiambocquid icquin abi tantiaquido bëdambuen isquin abi dëniacnuequido mënchicshun abi yacno tabadmendac. Abitedishun Icbombo yanshun nidaidën icquidtedishun chuiquid tapa Mesias caid icquin Esuquidistun matses abitedimbo namendac. Nuquin Papan abi chieshënquidquio icsho cuenmiaid icquin Esus tantiaquido chieshënquin badiadquidën badiadquidënquien Nuquin Papa tantiaquido icsambuen chuishunquid Mayan Icsa Satanas nec. Adembidi inchëshquidën inchëshquidënquien icsambuen chuishundednequid nec.

Aden cuenmiaquien matses tabadacno nidaidën nisi dapabimbuecquid aton iuabobëdi budbudposh. Aidi ëndenquimboshë icpampid Mayan Icsa cashumbic Satanas quequin cuënaid neposh. Aidëmbi nëbi matses abitedimbo mua uaquin icsamequin iuate bunquiec.

Mayan Icsa Satanas cuenmiaid tantiec cuishonquenuna. Nuquin Papabëd icquido yec adec cuishonquenuna. Adec ubitedi cuishonquenuc ¡padtemboshë! Nidaidën tabadquido matses yec acten icquido yec quec cuishonquetiapimbo iquec. Nëshunquio cuenmiac nidaidën budash: Ubi cuidtequid nëbi yanec, quequin tantiaquin Nuquin Papa chieshënquid yec Mayan Icsa Satanas chieshëmënquiec tabadec. Adec tabadquin mibitedi icsamete bunquin mibi natiambo icmendac, quequin chiec onquesho tantiapombi.

Adnubien Nuquin Papa yacnouësh nëidtedi cuesnannu, quec tabadsho ispombi. Nuquin Papabëd icquidën chuiquid tapa Miqued caid ambi namiaidobëdi. Adecbidi nisi dapabimbuecquid aton iuabobëdi. Aidotedi cuesnamposh.

Adsho issun nisi dapabimbuecquidën chido nëishënquioposh. Adshun aid chidon bacuëbobimbuecquid aton tsiuecquido chieshënquioposh. Uesquin cuessun secatiadquio icposh. Nuquin Papan chiacpadombuen naquin chieshtoenquio icquin Esus tantiaquin Aidën chiacpadombuen naquido icsho chieshënquioposh.

Adoshombic abuc ismiantequid utsitsen dacuëdampambocquid ismeuaposhi. Adoac chido uëshë dasiuidacbimbuec bëchamauanquiecsho ispombi. Inchëshën uëshë tincash tsadposh. Uispa 12ted tabëcquin nacnenaid mauete maueposh. Chido ambi bacuë usunaid nëncuenash paëmbo icnuc cumapenec sidquebud sidquebudec shubiec tsadsho ispombi.

Adnubien chidon dada bacuë tishposh. Aidi nidaid abitedi yacno tabadquidon Icbombo ictequidquio yec aidon chuiquid tapambo icquimbi icsambuen naquido icsho cuidquid ictequidquio neposh. Adquid icsho aton bacuë bedshunshun Nuquin Papa aton tsadte dapan tsadacnombo buamposh nisi dapabimbuecquidën petiapimbo icnuc. Adnubien chido nisi dapabimbuecquid cuenënec matses nibëdacnombo Nuquin Papan tantiacnombo nidposh. Ambo tabadsho issun Nuquin Papan bëdambuen dayun uaquin pete pemeposh. Amboshon seta 3ted matanmetanec seta utsi choaid poctsembo cuëscaquin dayunuaposh.

Adnubien ismiantequid utsitsen abuc choquin ismeuaposhi. Aidi nisi dapabimbuecquid nuamboshë icquid neposh. Taëchopaidquio yec piumboshë icposh. Mapi 7ted icnubi aton pais 10ted icposh. Aton mapitedi chuiquid tapan mauete mauecuededposh. Aidëmbi aton incuente ënapen icquidën uiccaquin uispa dadpen nidaidën siabudposh dadpenquioshë padabi icnuc. Adshumbic chidon tishshobi aton bacuë peshunnuen aiduidi bëisquin caimposh.

Adoshobien Nuquin Papan chiqui dapan podobiecquid meniac bedanec aid podombi cuenec matses nibëdacnombo masiuidquio yacno Nuquin Papan tantiacnombo chido nidposh. Ashunquio nisi dapabimbuecquidën icsa uatiapimbo icnuc seta 3ted matanmetanec seta utsi choaid poctsembo cuëscaquin Nuquin Papan aid chido pemequin dayunuaposh. Adnubien nisi dapabimbuecquidën: Aid chido cuessunnechitono, quequin aton ana shëcuënshun chomequin acte dapa chido yacno nua chomeposh. Aden acte dapa chomesho issumbien Nuquin Papan nidaid shëcuë uashun aid shëcuën acte ëquëduc nidmeposh chido yacno chotiapimbo icnuc.