Popular Bible Verses from Petedo 2 1

Nadatiambocquin nabanquid icquin Nuquin Papan Esus tantiamiaido nuqui nec. Aden tantiamiac aidën chiaid niac niacte bunenquio yec Esus tantiec nuqui bëdambuec tabadendac. Abipadquid utsi nibëdnuc bëdamboshëcquid icquin Nuquin Papan Esus tantiamequin ambi namiaido nuqui icmiac. Aden ambi chuinëdacpadombuen bëdamboshëcquid nuqui menec. Adoac aidën tantiamiac Nuquin Papan Chiaid isbanec Nuquin Papabimbuec icsate bunenquio yec nuqui bëdambuec tabadendac. Utsibo icsateuidi bunec icsambuen naic tabadnubi cuenacbimbuec mibitedi bëdambuec tabadendac.

Aden Nuquin Papan Esus tantiamiaido yec dayacquio icquid yacbimbuen ënenquio icquin aid tantiec bëdambuec tabadnuna. Adecbidi Nuquin Papan Chiaidquio tantiaquiec tabadnuna. Aden Nuquin Papan Chiaidquio isquin tantiec nuqui icsate bunacpadec icsainquio icquin ënnuna. Aden ënash nuqui chieshënquidbëd chieshënnanenquio icquin Esus tantianuna. Nuquin Papatsen tantiaquiec bëdambuec tabadnuna. Aden Nuquin Papabëta Esus tantiaquido yec tantiananec nashunnanquionona. Adec nashunnanec tabadquin nuquin shubun icquido tantiaquiacbimbuen matses abitedi tantianuna.

Umbi chuibuedtedi tantiaquin chieshtoenquio icquin nabanec mibitedi bëdambuec tabadquid yanendac. Adec tabadquin bëdiactsëc tantiactsëcbuedëmbi chieshtoenquio icquin Nuquin Icbo Esuquidistu tantiaquidquio mibi yanendac.

Tantia. Cun utsibo, mibitedi chuinu. Nuquin Papan: Cun matses canu, quequin Esus tantiamiaido mibitedi nec. Aden tantiamiaido icquin cute tapun nidaid ëquëducquio nidacbimbuen aid ënenquio icquin tantiaquid yec Esus tantiesa mibi yanuainquio iquendac.