Popular Bible Verses from 2 Pedro 2

Share

Ũ tỹ ti to: “ũn mág vỹ tỹ ti nĩ,” he mũ ag krenkren han ki kanhró tóg nĩ, Topẽ ti. Hã ra tóg ũ tỹ vẽjykre pãno han mũ ag vóg kónãn ke mũ, ti tỹ vẽnh kar jykre tugnỹm ke kurã ẽn kã.

Ag tỹ Topẽ japry ẽn sãn ja tũ nĩ ra tóg há tĩ vẽ. Hã ra ag tóg ti sãn sĩ han kar kỹ tovãnh mũ, Topẽ tỹ ag mỹ vẽnh vĩ há jẽnẽg mũ ẽn ti. Ag to ẽg tóg tag tó tĩ, ha mẽ: “cachorro vỹ ti tũgtũv ẽn ko mãn tĩ,” he ẽg tóg tĩ. “Porco tóg ti vẽnh kype há han kỹ jẽ ra óré mĩ vẽsĩn mãn tĩ. Kỹ tóg vẽnh kavénh mãn tĩ,” he ẽg tóg tĩ gé. Ũ tỹ vẽjykre kórég tovãnh kar kỹ han mãn tĩ ag to ken hã vẽ.

“Jatun mỹ ẽg tóg ẽg tỹ nén han sór mũ ẽn han kãn ke mũ. Topẽ vỹ ẽg to jũnh ke tũ nĩ,” he ag tóg tĩ, ón kỹ. Nén tỹ ẽg kavénh tĩ ẽn hã han ag tóg tĩ. Kỹ tóg tỹ ag jagrẽ nĩ, ẽprã vẽjykre ti. Ẽg tỹ nén ũ tovãnh sór mũ ra tovãnh ki kagtĩg nĩ ẽn vỹ tỹ ẽg jagrẽ nĩ sir, mỹr, ha mẽ.

Ẽg Senhor tỹ Jesus Cristo ki kanhró ja ag tóg nỹtĩ vẽ, ẽg kren han mũ ẽn ti. Ti tugrĩn ag tóg ẽprã vẽjykre kavéj kar tovãnh ja nĩgtĩ vẽ. Hã ra ag tóg ag tỹ nén tovãnh mũ ẽn han mãn mũ, kỹ tóg tỹ ag jagrẽ nĩ mãn mũ sir. Kỹ tóg ũri kórég kãfór nĩ, ag mỹ.

Hã ra ũ ag tóg ón kỹ Topẽ vĩ tó ja nĩgtĩ gé, vãsỹ, Israel ũ ag. Tag ve jé ãjag tóg ke mũ gé. Ũ ag tóg ón kỹ ãjag mỹ Topẽ vĩ kãmén sór ke mũ, ha vem nĩ. Ẽn ag vĩ vỹ ón kỹ ãjag mỹ mẽ há tĩ mẽ tĩnh ke mũ, hã ra tóg ãjag kókén ke mũ. Kỹ Topẽ vỹ vãhã ag tỹ tũ' henh ke mũ.