Popular Bible Verses from Hebreos 11

Share

¿Cꞌaꞌru li pa̱ba̱l? Li pa̱ba̱l aꞌan xnaubal nak relic chi ya̱l takacꞌul li yo̱co chiroybeninquil. Usta incꞌaꞌ nakil ru aban nakanau nak takacꞌul. Li Dios quisahoꞌ xchꞌo̱l riqꞌuineb li kaxeꞌto̱nil yucuaꞌ xban nak queꞌpa̱ban.

Ma̱ jokꞌe ta̱sahokꞌ xchꞌo̱l li Dios riqꞌuin li ani incꞌaꞌ napa̱ban. Ma̱ ani naru nachal riqꞌuin li Dios cui incꞌaꞌ naxpa̱b nak cuan li Dios ut nak aꞌan naxqꞌue xkꞌajca̱munquil li ani nasicꞌoc re.

Xban nak nakapa̱b li ra̱tin li Dios, nakanau nak li Dios quixyi̱b li choxa joꞌ ajcuiꞌ li ruchichꞌochꞌ. Ma̱cuaꞌ riqꞌuin cꞌaꞌak re ru quixyi̱b li ruchichꞌochꞌ. Yal riqꞌuin li ra̱tin quixyi̱b.

Xban lix pa̱ba̱l, laj Abraham qui-abin chiru li Dios nak quixye re nak ta̱e̱lk saꞌ li tenamit cuan cuiꞌ. Co̱ saꞌ li naꞌajej li quiyechiꞌi̱c re xban li Dios. Nak qui-el chak saꞌ li tenamit, co̱ chi incꞌaꞌ naxnau bar xic re. Xban lix pa̱ba̱l laj Abraham quicuan saꞌ li naꞌajej li quiyechiꞌi̱c re xban li Dios, ut quicuan aran joꞌ jun jalan xtenamit. Quixyi̱b xmuheba̱l tꞌicr xban nak yal numecꞌ re. Joꞌcan ajcuiꞌ queꞌxba̱nu laj Isaac ut laj Jacob xban nak aꞌaneb li teꞌe̱chani̱nk re li cꞌaꞌru quixyechiꞌi li Dios.

Xban lix pa̱ba̱l laj Noé, li Dios quixye re cꞌaꞌru talajcꞌulma̱nk. Ut laj Noé quixpa̱b li quixye li Dios usta toj ma̱jiꞌ nacꞌulman. Quixyi̱b li nimla jucub cab re xcolbal rib aꞌan, joꞌ eb ajcuiꞌ li ralal xcꞌajol. Ut lix pa̱ba̱l laj Noé quixcꞌutbesi nak li cuanqueb saꞌ ruchichꞌochꞌ incꞌaꞌ queꞌpa̱ban. Joꞌcan nak queꞌcam. Xban nak quipa̱ban, li Dios quixye nak ti̱c xchꞌo̱l laj Noé.

Xban lix pa̱ba̱l laj Enoc incꞌaꞌ quicam. Quicꞌameꞌ ban saꞌ choxa xban li Dios. Incꞌaꞌ chic queꞌxtau xban nak ac xcꞌameꞌ. Nakanau nak li Dios quisahoꞌ saꞌ xchꞌo̱l riqꞌuin nak toj ma̱jiꞌ nacꞌameꞌ saꞌ choxa xban nak joꞌcan tzꞌi̱banbil saꞌ li Santil Hu.

Xban lix pa̱ba̱l laj Abel, quixqꞌue jun xmayej cha̱bil chiru li quixqꞌue laj Caín. Xban lix pa̱ba̱l, li Dios quixye nak ti̱c xchꞌo̱l ut quixcꞌul lix mayej. Usta camenak chic laj Abel, aban toj cuan retalil chokꞌ ke la̱o chanru nak quipa̱ban chiru li Dios.

Xban lix pa̱ba̱leb, laj Abraham ut lix Sara quicuan jun lix cꞌulaꞌal saꞌ xti̱xilaleb, usta lix Sara aꞌan jun ixk incꞌaꞌ naqꞌuiresin. Aban queꞌxnau nak teꞌxcꞌul li cꞌaꞌru quiyechiꞌi̱c reheb xban li Dios.

Laj Abraham incꞌaꞌ quixyi̱b cha̱bil ochoch, xban nak yo̱ chiroybeninquil jun xnaꞌaj saꞌ li santil choxa. Li naꞌajej aꞌan yi̱banbil xban li Ka̱cuaꞌ Dios ut ta̱cua̱nk chi junelic.

Xban lix pa̱ba̱l laj Moisés, nak quicui̱nkiloꞌ incꞌaꞌ quiraj nak teꞌxye nak lix rabin li rey, aꞌan lix naꞌ. Incꞌaꞌ quiraj tzꞌako̱nc saꞌ li sahil chꞌo̱lej cuanqueb cuiꞌ laj Egipto. Quixnau nak li sahil chꞌo̱lej aꞌan yal nanumeꞌ. Quiraj ban xcꞌulbal li raylal li yo̱queb chixcꞌulbal laj Israel lix tenamit li Dios. Naxnau nak kꞌaxal lokꞌ nak tixcꞌul li raylal saꞌ xcꞌabaꞌ li Cristo chiru xcꞌulbal lix biomal li tenamit Egipto. Ut yo̱ chiroybeninquil lix kꞌajca̱munquil li ta̱qꞌuehekꞌ re xban li Dios. Xban xpa̱ba̱l laj Moisés qui-el chak saꞌ li tenamit Egipto ut incꞌaꞌ quixucuac chiru li rey usta yo̱ xjoskꞌil saꞌ xbe̱n. Quixcacuubresi xchꞌo̱l xban nak naxnau nak li Dios cuan riqꞌuin. Chanchan li yo̱ chirilbal ru, aban li Dios ma̱ ani na-iloc ru.

Laj Abraham quiyaleꞌ lix pa̱ba̱l xban li Dios nak quixye re nak tixmayeja li ralal. Jun ajcuiꞌ li ralal cuan, aban xban nak naxpa̱b li Dios, laj Abraham quixqꞌue laj Isaac chokꞌ xmayej.

Lix Rahab aꞌan jun ixk naxcꞌayi rib nak quicuan. Xban nak quipa̱ban, quixtenkꞌaheb laj Israel li queꞌchal chixqꞌuebal retal li tenamit. Xban lix pa̱ba̱l, lix Rahab incꞌaꞌ quicam saꞌ xya̱nkeb li incꞌaꞌ queꞌpa̱ban re li Dios.

Xban lix pa̱ba̱leb laj Israel, queꞌnumeꞌ saꞌ xyi li Caki Palau. Chaki chꞌochꞌ li queꞌnumeꞌ cuiꞌ. Ut joꞌcan ajcuiꞌ queꞌraj xba̱nunquil eb laj Egipto. Aban incꞌaꞌ queꞌru xban nak li haꞌ quixjunaji rib saꞌ xbe̱neb ut aran queꞌosoꞌ chixjunileb.

Xban lix pa̱ba̱leb laj Israel, cuukub cutan queꞌxsuti rix li tenamit Jericó. Ut saꞌ xcuuk li cutan quitꞌaneꞌ li tzꞌac li sutsu cuiꞌ li tenamit. Ut queꞌre̱chani li tenamit.

Xban lix pa̱ba̱l, laj Moisés quixba̱nu li pascua joꞌ quiyeheꞌ re xban li Dios. Nak e̱lqueb re Egipto quixtakla xqꞌuebal xquiqꞌuel li carner chiruheb li puerta. Ut nak quinumeꞌ li ángel chi camsi̱nc, ma̱ jun li xbe̱n ralaleb laj Israel quixcamsi.

Xban lix pa̱ba̱l laj José, nak ac ca̱mc re, quixjultica reheb laj Israel nak saꞌ jun cutan teꞌe̱lk saꞌ li tenamit Egipto. Ut quixye ajcuiꞌ reheb nak teꞌxcꞌam lix bakel nak teꞌe̱lk saꞌ li tenamit aꞌan.

Laj Jacob quixpa̱b nak tixcꞌul li quiyechiꞌi̱c re xban li Dios. Joꞌcan nak ac ca̱mc re, laj Jacob quirosobtesiheb li ralal laj José. Ut chirix aꞌan, laj Jacob quixxulub rib saꞌ xbe̱n lix xukꞌ ut quixlokꞌoni li Dios.

Laj Isaac quixpa̱b nak li Dios tixqꞌue li quixyechiꞌi re. Joꞌcan nak quixye reheb laj Jacob ut laj Esaú nak li Dios ta̱osobtesi̱nk reheb nak ta̱cuulak xkꞌehil.