Popular Bible Verses from Maku 13

Share

Katupono ti uimohey haria ti eipe miꞌi pote ti aru wuatꞌi iꞌatupyꞌahak ehete e. Maꞌato uwe uwe taꞌatusatyꞌi satyꞌi pykai yt uiwaure i wuatꞌi eꞌat pe miꞌi hat ti aru Tupana miehakyeraꞌat topyhuꞌat wuatꞌi eꞌat pe e Iesui.

Miꞌi tupono eiwatetup we o eweikupteꞌen katupono yt uwe i ikuap karãpe mekewat eꞌat putꞌok e hap e Iesui temiitꞌin me.

Miꞌi hawyi karãpe eipyhik ehehay kuap hamo miꞌi pote o yt eweikenꞌẽ teiꞌo miꞌi hap eꞌat pe are katupono mekewat eꞌat pe Tupana Paꞌãu ti aru eiwẽ pyi henoi kat som waku etiꞌatuwesat e.

Taꞌi aat waikiru yi ti aru ikahuro yne maꞌato uimienoi koꞌi yne yt sake i ikahuro e Iesui.

Yt uwe i mesuwarotiaria ikuap karamuo mekewat eꞌat putꞌok e hap e. Yt atipy piaria i wyti ikuap yt Haꞌyru i wyti ikuap. Maꞌato Uiꞌywot atipy piat yn wyti ikuap e.

Miꞌi hap upi ti aru toĩ wuꞌuka hap koꞌi wuatꞌi setama puo iꞌewyte ehetama puo iraniaꞌin etama puo wyti aru yne kaipyi wuꞌuka hap sehay eweikuap maꞌato o yt gytꞌeweiꞌe teiꞌo katupono ti aru yt ikahuro hap i te e.

Pyno uiwyriaꞌin waku eiperia eiwatetup o katupono yt eweikuap i kat eꞌat putꞌok e netap kaꞌiwat sio hunete sio wãtym hake turan sio waipaka ehay turan yt uwe ikuap i kat eꞌat hetap kaꞌiwat toꞌaipok iraꞌyn e. Yt naku i eiket kai eipuẽti taꞌaipok turan. Kat som mekewat eꞌat etiat ahenoi yne uhemiitꞌin kuap hamuat e. Waku eiwatetup o e.

Iꞌewyte ti aru wẽtup ywania wẽtup ywania wywo ti aru toꞌoꞌatuuka atuuka iꞌewyte ti aru wẽtup setama wẽtup setama wywo toꞌoꞌatuuka atuuka yne mesuwat yi wato hap oktan e. Miꞌi hap ewy ti aru aikope aikope yi huruk hurukꞌe. Iꞌewyte iꞌatu rakaria hesyꞌat rakaria teꞌeropyhuꞌat yt kat i miꞌu mesuwat rotiat pote e. Meiũran topyhuꞌat aikotã haryporia mepyt wemoherep hap eꞌat katupono toineꞌen saꞌawyꞌi wuat haty hap wen maꞌato meiũran ti aru poꞌog poꞌog haty wo rakat tuut e.

Mesuwat uhehay wakuap wyti aru wuatꞌi miitꞌin me yi wato oktan tuwemoherep ikahuro hap sese owakai te e.

Taꞌi miꞌiria ti -Uito ti Tupana Mipoꞌoro Miitꞌin Porekuat nuat raꞌyn iꞌatuꞌe ti aru miitꞌin me maꞌato iꞌatueso. Teꞌeropotmaꞌat kahato ti aru mio tã iꞌatuꞌe e.

Eiwanetup kahato o katupono wyti aru ehum wanikaptia po pe raꞌyn eipe tuꞌisaria po pe raꞌyn eipe e. Miꞌi hawyi eiꞌahyk ahyk wyti aru Tupana motypot hawe e. Miꞌi hawyi ti aru iꞌatuporekuat po pe iꞌatuetuꞌisa po pe eweikupteꞌen hawyi ehenoi kuap uhetiat hamuat e.

Katupono ti aru iꞌatu kahato -Uito Tupana Mipoꞌoro Eiporekuat nuat e haria ewywuat saꞌag koꞌi teꞌeruwemoherep mesuwat yi totiat kape e. Tupana ehay henoi saꞌag haria neꞌi yt pywo pe i maꞌato teꞌeruwemotypot hanuaria e. Miꞌiria ti aru aikotã aikotã imoherep taꞌatuesaika hap iwato rakat iꞌatuminug koꞌi ti aru yt miit minug kuap i ewy taꞌatunug Tupana miꞌairoria sese maꞌat reran haype e.

Miꞌi hawyi mekewat hoꞌopot hap eꞌat tokosap hawyi ti aru yt hẽtyhot i sese i raꞌyn aat iꞌewyte waty iꞌypyryp raꞌyn e. Iꞌewyte ti aru waikiru koꞌi taꞌatueiam myi hewo hewo hawyi ti aru huruk hurukꞌe atipy e.