Popular Bible Verses from Iesui Potmuꞌeria 4

Share

Wẽtup miit yn ni ahehakyeraꞌat kuap hat e. Miꞌi Miit set ti Iesui e. Yt uwe i miꞌi rẽ mesuwarotiat wuatꞌi Ehakyeraꞌat kuap hat e. Iesui mohey hap upi yn ni ahehakyeraꞌat kuap Tupana e Peteru haty wo.

Mio tã iꞌatuꞌe pote tyryꞌe kahato meiẽwat iꞌatuwaꞌatunug hap getap. Miꞌi hawyi Tupana Paꞌãu Wakuat tiꞌatumoesaika kahato raꞌyn itotiaria iꞌatumiẽtup ewy. Miꞌi kaipyi yt teꞌerokenꞌẽ hin i raꞌyn wanikaptia pupi. Miꞌi hawyi Tupana ehay yn naꞌyn iꞌatuehay wo.

Koitywy mesuwe miitꞌin akag koꞌi aiꞌakit reran kahato iꞌatuꞌe. Miꞌi pote Tupana urumoesaika kahato esaika hamo ehay Iesui etiat moherep torannia miitꞌin miat hamo iꞌatuꞌe.

Iesui ti Nu Wakuat kahato ewy e. Miꞌi Nu wo Tupana tunug naꞌyn toꞌyat koro sese e. Pywo ti rat Nu iheg kahato rakat ewy kahato Iesui e. Miꞌi waku uiꞌyat koro nug hamuat e Tupana saꞌawyꞌi morekuat Tawi miwan me Saumu 118.22 pe e ehepe wen maꞌato mekewat Nu pun haria wo kahato eweikupteꞌen mesup eiperia e. Yt naku i kahato e. Maꞌato Eimipun wo ti Tupana haꞌawynug naꞌyn toꞌyat sese e.

Miꞌi hawyi morekuaria itotiaria teꞌeroꞌe toꞌope -Kat pote som aipupi yt teꞌerokenꞌẽ hin i Peteru Iuwãu iꞌatuꞌe. Yt karãpe i ti miꞌiria teꞌerupotmuꞌe kahato woꞌomuꞌe hap wato sese puo. Aiꞌewy wen maꞌato miꞌi pykai iꞌatuehay kuap kahato rakaria ewy. Pira pytyk haria miꞌiria miitꞌin eropat haria yn miꞌiria maꞌato iꞌatuehay poꞌog ikahu woꞌomuꞌe haria akag koꞌi kai iꞌatuꞌe toꞌope nagnia. Uwe pyno iꞌatumuꞌe mio tã e hap nug hamo iꞌatuꞌe toꞌope. Teꞌeruwanetup hawyi -Taꞌi Iesui tiꞌatumuꞌe miꞌiria haꞌawytepyi tomikuap koꞌi ete. Miꞌi pote mesup Taꞌatukaꞌiwat Iesui ewy kahato taꞌatunug iꞌatuꞌe toꞌope.

Miꞌi hawyi Iesui mohey haria woꞌokyꞌe kahato haria tukupteꞌen itote aikotã wẽtup miit ewy kahato iꞌatupyꞌa wasu hap. Taꞌi wẽtup miit ewy yn iꞌatuwanetup hap. Miꞌi hawyi iꞌatuegyiꞌat kahato rakaria wo tukupteꞌen itote. Miꞌi hawyi yt uwe i itote -Uiatnuat yn uhekat e hat topyhuꞌat iꞌatupyꞌasetpe katupono taꞌatumoꞌẽ kahato toꞌope kat koꞌi kat koꞌi iꞌatuekat e. -Taꞌi aiwatnuat topyhuꞌat yne uhekat yne uruekat mesup iꞌatuꞌe toꞌope katupono taꞌatukyꞌe kahato saꞌawyꞌi Iesui mohey haria itote.