Popular Bible Verses from 1 Kuriniu 1

Share

Maꞌato toiꞌairo yt weꞌeg i haria temiit no typyꞌi kahato. Miꞌi tã tutunug hawyi toiꞌatumohit kahato -Uito poꞌog weꞌeg hat e haria. Iꞌewyte ti Tupana tiꞌairo miitꞌin emiit temiit no typyꞌi kahato. Miꞌiria kaipyi ti toimohit -Uito poꞌog torannia kai e haria.

Taꞌi ariaꞌyp posak etiat Iesui ikuꞌuro ahetianuat enoi hap ti yt hee hin i mekewat hoꞌowasat rakaria pe -Yt eweꞌeg hin i ti iꞌatuꞌe neꞌi ahepe. Maꞌato aito Iesui mikyꞌeria pe ti hee kahato raꞌyn katupono watikuap taꞌyn hesaika kahato mekewat sehay hap.

Katupono mekewat Tupana weꞌeg hap poꞌog iweꞌeg torannia aiweꞌeg hap kai watoꞌe. Katupono Tupana tuwekyryꞌi pote poꞌog iweꞌeg torannia mesuwiaria weꞌeg hap koꞌi kai haype watoꞌe. Katupono Tupana perupꞌi hap ti poꞌog hesaika mesuwarotiat hesaika rakaria kai watoꞌe yn ahehay.

Miꞌi pote waku watomohey iꞌe hap torannia aipyꞌa pe. Saꞌawyꞌi toꞌe -Atikyꞌesat eipe Uhaꞌyru ekatuwyria sese wo eweikupteꞌen e. Ewetunug Miꞌi Miit Uhaꞌyru Eipotypot no pote waku pe iwywo eweikupteꞌen wuatꞌi eꞌat pe e ahepe. Miꞌi hawyi waku watomohey kahato iꞌe hap ewy mesup te.

Uheꞌywytꞌin uheinytꞌin pywo pe areꞌe ehepe Aipotypot Aikaꞌiwat Iesui ehay moherep hat ti uito are. Miꞌi tupono ahẽtup eiwoꞌoehay upi eweikupteꞌen. Miꞌi pote -Pywo pywo eweiꞌe eiwoꞌope hawyi eiwoꞌowehik kahato. Miꞌi hawyi wẽtup wanetup hap wywo yn eweikupteꞌen. Waku aiwoꞌoꞌewy yn watoineꞌen wẽtup mikyꞌesat upi yn hawyi sehay yt kat i aiwoꞌosytpok hap toineꞌen aikai.

Aikope aru tukupteꞌen -Wuatꞌi etiat kuap haria uruto e haria e. Aikope aru tukupteꞌen wuatꞌi sehay kuap haria. Aikope tukupteꞌen mekewat iraniaꞌin akit taꞌatuehay wuat haria. Taꞌi yt aikope i ti aru katupono iꞌatuwat iꞌatuweꞌeg hap Tupana tiꞌakit yne raꞌyn. Miꞌi hawyi miitꞌin weꞌeg hap topyhuꞌat wuatꞌi miꞌakit akit wo raꞌyn.