Popular Bible Verses from Jeremias 22

Share

— Ihe Tupàn Tuweharupi Wiko Ma'e amume'u ko ma'e peme kury. — Pezapo ikatu ma'e wanupe nehe. Pemunar zo wama'e rehe nehe. Imunar ma'e imunar waiko wama'e rehe wà. Pepyro imunar ma'e wanuwi pe wà nehe. Pepuraraw kar zo ma'erahy amo ywy rehe arer peywy rehe har wanupe nehe, tu 'ym ma'e wanupe nehe no, kuzà imen umàno ma'e kwer wanupe nehe no. Pezuka zo teko ikatu ma'e 'aw tàpuz ihewe imur katu pyrer pe wà nehe.

Erezapo tàpuzuhu ywyràkàxigyw pupe ipyao pyrer ne. Ikatu amo tàpuzuhu wi. Aipo xo a'e rupi zo ereiko tuwihawete romo. Zuzi neru wiko wyzài tuwihawete ài. Ikatu a'e. Na'imunar kwaw. Hemiapo kwer paw ikatu. Wereko katu hemetarer 'ym ma'e wà, ma'e hereko 'ymar wà no. Heko awer ikatu. Agwer ma'e iapo har wexak kar hekwaw haw purupe wà. Ihe Tupàn Tuweharupi Wiko Ma'e aiko ko ma'e imume'u har romo ihe.

Aze amo uzapo tawhu purupe ma'erahy ipuraraw kar pà wà nehe, ma'e rehe imunar pà wà nehe, aze numekuzar kwaw uwake har wama'ereko haw nehe, aze umuma'ereko e kar wà nehe, uzemumikahy putar wà nehe, ta'e azepyk putar wanehe nehe xe.