Popular Bible Verses from Apocalipsis 13

Share

As tzitzi' la ootzilkat uva' ab'il uva' at itxumb'al, tan asoj at itxumb'al umaj uxhchil, as la tixma ve't u ache' uva' tetz u txooe' uva' kat je' ch'u'l xe' u mar, tan eela kuxh u ache' tuk' unq'a ache' uva' nu kub'anb'e. As a'e' u 666.

As oksal ve't iq'ii u txooe' ta'n unq'a tename' uve' ye'l vib'iie' tz'ib'amal tu u u'uje' uve' tetz u Kaneero'e' uve' kat yatz'pi. As a' unq'a tename' uva' ye'l vib'iie' tz'ib'amal tu u u'uje' xe' q'iisaj.

As tal ve't u txooe' uva' je' ch'u'l tu tx'ava' uva' la oksal ve't texhlal unq'a tename' skajayil tiseb'al iq'ab' as moj xo'l ipala. As ok ve't texhlal unq'a tename', k'uxh ch'oo, k'uxh nim, k'uxh tx'ioliq'ii, k'uxh meeb'a', k'uxh k'am, as k'uxh jit k'am, tan asoj at umaj ab'il uva' ye' la ok texhlal, as ye' la uch ve't ik'ayine'. As mita'n la uch iloq'one', tan ti' uva' ye'l texhlal vib'ii u txooe' uva' je' ch'u'l xe' u mar ato'k sti' as moj tachul vib'ii u txooe'.

Tan ab'il uva' la alpu sti' uva' la b'en preexhuil, as b'enoj preexhuil. As ab'il uva' la alpu sti' uva' la kam ta'n ch'ich', as kamoj ta'n ch'ich'. As tzitzi' la kuk'uchkat uva' k'ujle'l chit kuk'u'l ti' u Tiixhe', o' uva' o' itenam Aak, tan k'uxh la kupaleb'e unq'a k'axk'oe', as ye' la kuya'sa kuk'ujb'a't kuk'u'l ti' Aak.

Txaklik in vi' u sanab'e' tzi' u mare', as vil ije' ve't ch'u'l uma't u txoo xe' u mar uva' laval tuk' atike tuk' vujva't ivi'. As atik je' uma'l u koroona ti' junun unq'a tuk' txooe'. As tz'ib'amal ve't ok uma'l u b'ii ti' junun unq'a ivi' txooe', uva' nikat iyoq'on ti' u Tiixhe'.

As kat aq'ax ve't te txoo ti' ixe'tisat ch'a'o ti' vitenam u Tiixhe' as ti' toleb' sti'. As kat aq'ax ve't tijle'm txoo ti' unq'a nimla tename' skajayil, as kam kuxh aamail, as kam kuxh tenamil, as kam kuxh yolb'alil.

As imaxtib'e ve't txoo unq'a tename' tuk' u k'uchb'al tetz u tijle'me' vatz u txooe' uva' ma'tik ije' ch'u'l xe' u mar. As tal ve't u txooe' te unq'a tename' uva' la oksal iq'ii u txooe' uva' je' ch'u'l xe' u mar. As la b'anchu ve't ivatzib'al txoo, tan k'uxh ma'tik itzok'pu txoo ta'n ch'ich', as isle'ltel txoo. As kat aq'ax ve't te u txooe' uva' kat je' ch'u'l tu tx'ava' ti' taq'at itiichajil vivatzib'al u txooe' uva' je' ch'u'l xe' u mar. As yolon ve't ivatzib'al u txooe' ti' talat iyatz'pu ve't unq'a uxhchile' uva' ye' la ku' qaaloj vatz u vatzib'ale'.

As echik tilon u txooe' eche' q'amb'o'lay. As echik u toj txooe' eche' toj oso. As echik vitzi' txooe' eche' itzi' u b'alame'. As mama'la yak'il kat taq' ve't u nimla tx'i'latxooe' te u txooe'. As kat taq' ve't u tx'i'latxooe' vixonleb'ale' tuk' u tijle'me' te u txooe'.

As u txooe' uva' kat je' ch'u'l xe' u mar as kat aq'ax ve't te txoo ti' uva' la ije'sa ve't tib' txoo. As tul nik iyolon ve't txoo, as kat yoq'on ve't txoo ti' u Tiixhe'. As ka'va'l toxk'al (42) ich' kat aq'ax ve't tijle'm txoo.

As ech tilon uma'l vivi' u txooe' eche' umaj uxhchil uva' k'axb'inal ve'te' ti' ikame'. As kat txansal ve't vivi' u txooe' uva' k'axb'inalike. As tul kat ilpi uva' kat txansal ve't vivi' u txooe', as kat xekeb' ve't unq'a tename' ti' txoo.

As vil ije' ve't ch'u'l uma't u txoo tu tx'ava'. As atik ka'va'l tuk' txoo, eche' tuk' umaj kaneero'. As ech iyolon u txooe' eche' umaj nimla tx'i'latxoo. As atin ve't u txooe' vatz u txooe' uva' ma'tik ije' ch'u'l xe' u mar, tan eela u tijle'm txooe' skaab'il. As tal ve't u txooe' uva' je' ch'u'l tu tx'ava' uva' la ku' ve't unq'a tename' skajayil qaaloj vatz u txooe' uva' je' ch'u'l xe' u mar uva' k'axb'inalike as ma'tik itxansale'.