Popular Bible Verses from Roma 8

Share

‘Ua tatou iloa fo‘i e galue le Atua i mea uma lava mo le lelei fa‘atasi ma i latou o ē ‘ua alolofa atu ‘iā te ia, o ē ‘ua vala‘auina i lona finagalo.

Auā ‘ua ‘ou mautinoa, e lē mafaia e le oti, po o le ola, po o agelu, po o ali‘i, po o ē malolosi, po o mea i nei ona po, po o mea atalī, po o le maualuga, po o le loloto, po o se tasi mea na faia, e lē mafaia e ia mea ‘ona fa‘ate‘a‘eseina mai i tatou i le alofa o le Atua, o lo‘o ‘iā Keriso Iesu lo tatou Ali‘i.

E fa‘apea fo‘i le Agaga ‘ona fesoasoani mai i lo tatou vaivai; auā tatou te lē iloa mea tatou te ole atu ai ma le tusa, ‘ae peita‘i o le Agaga, e fautua o ia mo i tatou i lē ōi e lē mafai ‘ona talatalaina.

O lenei, se a sa tatou ‘upu i nei mea? ‘Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?

O lenei, ‘ua leai se fa‘asala i ē o ‘iā Keriso Iesu, o ē le sāvavali i la le tino, ‘ae i la le Agaga

Auā o le loto i la le tino o le oti lea; o le loto i la le Agaga o le ola lea ma le manuia

A ‘ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou.

Auā o lo‘u manatu e lē tatau ‘ona fa‘atusaina le tigā i nei ona po ma le manuia atalī e fa‘aalia mai ‘iā te i tatou.

O ai sē na te fa‘ate‘a‘eseina mai i tatou i le alofa o Keriso? O le puapuagā ‘ea, po o le atuatuvale, po o le sauā, po o le oge, po o lē lavalavā, po o le pagātia, po o le pelu?

A o lē su‘esu‘e i loto, ‘ua silafia e ia le finagalo o le Agaga; auā o lo‘o fautua o ia mo le ‘au pa‘ia e tusa ma le finagalo o le Atua.

Auā o i latou uma ‘ua ta‘ita‘iina e le Agaga o le Atua, o atali‘i i latou o le Atua.

Auā o ē i la le tino o loto atu i latou i mea a le tino; a o ē i la le Agaga e loto atu i mea a le Agaga.

O ia lava sa na lē fa‘asaoina lona lava Alo, a ‘ua tu‘uina mai o ia ‘ona o i tatou uma lava, e lē foa‘i fua mai ‘ea e ia ‘iā te i tatou mea uma lava fa‘atasi ma ia i se a?

O lo‘o molimau mai lea lava Agaga i o tatou agaga, o fānau i tatou a le Atua. ‘Āfai fo‘i o fānau i tatou, o suli fo‘i, o suli lava o le Atua, o suli fa‘atasi ma Keriso; pe ‘āfai tatou te tigā fa‘atasi ma ia, ‘ina ‘ia fa‘amanuiaina fo‘i i tatou fa‘atasi ma ia.

auā o le loto i la le tino o le ita lea i le Atua; auā e lē usiusita‘i i le tulafono a le Atua, e lē mafai fo‘i i ai.

Auā o lo‘o fa‘atalitali mea uma na faia ma le naunau i le fa‘aalia mai o atali‘i o le Atua.

Auā ‘ua tatou iloa, ‘ua ōi fa‘atasi, ma ‘o‘ono fa‘atasi mea uma lava na faia, ‘ua o‘o mai lava i ona po nei.