Popular Bible Verses from Esoto 15

Share

‘Ua ia fetalai mai fo‘i, “‘Āfai ‘e te matuā fa‘alogo i le leo o le ALI‘I lou Atua, ma e fai le amio tonu i ona luma, ma ‘ia e ua‘i mai ou taliga i ana poloa‘iga, ma e tausi i ana sauniga uma lava, ‘ou te lē tu‘uina atu ‘iā te oe se tasi o ia ma‘i na ‘ou tu‘uina atu ‘iā Aikupito; auā o a‘u o le ALI‘I, o lē na te fa‘amālōlōina oe.”

O le ALI‘I, o lo‘u malosi ia ma la‘u pese, ‘ua fai fo‘i o ia mo‘u olataga. O lo‘u Atua lenei, ‘ou te fa‘ane‘ene‘e i ai; o le Atua o lo‘u tamā, ‘ou te vivi‘i lava ‘iā te ia.

“Le ALI‘I e, o ai ‘ea sē ‘ua tusa ma oe i le vao atua? O ai sē ‘ua tusa ma oe, o lē silisili ‘ona pa‘ia, o lē mata‘utia i vi‘iga, o lē fai vāvega?

“O lou alofa ‘ua e ta‘ita‘iina mai ai lenei nu‘u, ‘ua e togiolaina ai lava; o lou malosi ‘ua e ta‘ita‘iina ai i latou i lou afio‘aga pa‘ia.

‘Ua latou o‘o fo‘i i Mara; ‘ae le‘i mafai ‘ona latou inu i le vai i Mara, auā ‘ua ‘o‘ona; o le mea lea na igoa ai lea mea o Mara. ‘Ona muimui ai lea o le nu‘u ‘iā Mose, o lo‘o fai mai, “Se a se mea a matou inu ai?” ‘Ona ia ‘alaga atu lea i le ALI‘I, ‘ona fa‘aali lea o le ALI‘I ‘iā te ia o le la‘au; ‘ua na lafoina i le vai, ‘ona māgalo ai lea o le vai. ‘Ua ia tu‘uina atu i lea mea o le tulafono ma le fa‘amasinoga ‘iā te i latou, ‘ua ‘ia tofotofo fo‘i ‘iā te i latou i lea lava mea.