Popular Bible Verses from Jesaja 58

Share

De HAR woat junt dan emma leiden, un enne drieeje Tiet halpen tofräd sennen, un junt stoakje Knoakes jäwen. Jie woaren sennen aus een jewessada Goaden, ooda soo aus eene Kjwal dee emma Wota jeft.

Nä, waut däm HARN jefelt, es soon Fausten, wua jie dee frieloten, woone jie orrajcht bedwinjen, wua jie de Reemes von daut Joch opleesen un jie dee frieloten, waut jie unjadrekjen, un jieda Joch rauf nämen. Jäft de hungaje Broot un nämt de oame opp, waut kjeene Städ haben; jäft dee Kjleeda, waut nich jenuach haben, un trakjt junt nich trigj von jun ieejnet Frintschoft.

Dan woat junt daut oppdachen aus daut Morjenroot, un jie woaren bosich veheelen. Dee wäa junt jerajcht moakt, woat veropp gonen, un soo harlich aus daut bie däm HARN es, woat daut met de latste sennen.

Dan woa jie aunroopen, un de HAR woat siene Auntwuat jäwen, jie woaren schrieen, un hee woat sajen: Ekj sie hia. Nämt daut Joch wajch, met woont jie däm näakjsten daut schwoa moaken, un wiest nich met däm Finja, un rät däm Noba nich schlajchtet no.

Moakt jun Hoat op fa dee waut hungat, un stalt dee waut lieden tofräd. Dan woat junt kloa woaren waut diesta wia, un waut dunkel scheen, woat soo sennen aus de Sonn opp Meddach.

June Mana woaren june Ruinen trajchtbuen, un opp daut Fundament von frieejoa oppbuen. Jie woaren bekaunt sennen aus dee, dee de Wenj toomieren un de Wäaj bäta moaken, daut doa to läwen es.

Wan du aum Sabat nich reisen woascht un aun miene heilje Doag nich hanjeist, no waut die jankat; wan du sajen woascht, daut de Sabat eene Freid es, un daut däm HARN sien heilja Dach wichtich es; wan du däm ieren woascht un nich aun däm Reisen moakst, un nich diene Oabeit no jeist un onneedjet rätst; dan woascht du die aum HARN freien, un ekj woa die loten goot foadich woaren opp dise Ieed un die opp däm Staumvoda Jakob sien Launt tofräd stalen. Dit haft de HAR selfst jesajcht.

Soogoa wan jie fausten, stried jie junt, jie zanken junt un schlonen met eene dolle Fust. Jie derwen nich soo fausten aus dit, wan jun Jebäd bowen saul eene Auntwuat kjrieen. Saul mie soon Fausten jefaulen, wan jie Sachen fa mie oppjäwen, jie june Kjap henjen loten aus walkjet Graus, un jie en Sakkjleeda un Ausch setten? Kjenn jie daut werkjlich een Fausten nanen? Jleew jie, daut es waut däm HARN jefelt?