Popular Bible Verses from Hesekiel 33

Share

Un saj to an: Gott de HAR sajcht gaunz kloa: Doa es nuscht waut mie doaraun jefelt, wan een Mensch en siene Sinden stoaft. Waut mie jefelt es, wan een Sinda met siene Sind opphieet, un läft. Ekj fodda junt Israeliten opp, daut jie met june beese Wäaj opphieren. Wuarom well jie stoawen?

Un Menschensän, ekj hab die nu aunjestalt aus Wajchta äwa Israel. Wan du hieescht waut ekj saj, dan saust du daut en mienen Nomen wieda jäwen un an woarnen.

Oba wan du eenen beesen Mensch woarnst wäajen sien Läwen, daut hee sikj endren saul, un hee endat sikj oba nich, dan woat hee fa siene Sinden stoawen, oba du hast dien Läwen veschoont.

Wan oba de Wajchta sitt, daut de framde Armee kjemt, un nich de Posaun blost, un sien Volkj nich woarnt, dan wan de Fient kjemt un doa wäa bie omkjemt, woat de Wajchta schuldich sennen fa dän Doot, wan de Mensch uk fa siene Sinden wajchjenomen woat.

Dee haft de Posaun jehieet un sikj doch noch nich woarnen loten. Daut es wuarom hee selfst schuldich es, fa daut waut am jeworden es. Oba dee waut sikj woarnen lat, dee kaun sien Läwen raden.