Popular Bible Verses from Icaya 9

Share

Pien doŋ ginywalo botwa latin, gimiyo botwa latin laco; gibimiyo en tiŋo twero me Loc i wi gwoke, nyiŋe gibicako ni, “Lami-tam ma giuro, Lubaŋa Won Twer, Won ma bedo nakanaka, Laloc ma kelo kuc.”

Jo ma yam gibedo i piny macol doŋ guneno dero cen madit; ki jo ma yam bedo i lobo me mutu me piny macollicuc, ceŋ doŋ oryeny omenyogi.

Doŋ medde me locce ki kuc ma bia iye ka gikke bibedo pe, i wi komker pa Daudi, ki i wi kerre, me mokone ocuŋ matek ki gwokone wek pe opoti, i ŋolo kop atir ki i kit ma atir, cakke tin dok me bedo matwal. Arima pa Rwot me mony bimiyo man cobbe.

Pien war pa oteka lweny ducu ma ginyono ki piny i dye lweny, ki boŋŋi ducu ma ginywano woko ki remo, gibiwaŋogi woko ki mac ma ka yen.

Dano yam gicayo lobo Jabulon ki lobo Naputali, ento en bimiyo piny ma neno yo tuŋ i nam, loka Jordan, Galilaya pa lurok, doko me deyo.

In doŋ imiyo jo me rokwa onya, imedo bene yomcwiny botgi; gibedo ki yomcwiny i nyimi, kit ma dano bedo kwede i kare me kac, kit ma dano bedo kwede ki yomcwiny ka gipoko jami ma guyako.

Pien okolgi mapek, ki odoo ma goyo gwokgi, ki odoo ma yam giburogi kwede tektek me tiyo tic, in doŋ iturogi woko ducu, macalo i nino pa jo Midian.