Popular Bible Verses from Génesis 49

Share

Co inso tëranta huaꞌan quëran, quëmasoꞌ Cota, ocoiarinënhuëꞌ. Huara sëꞌquëranso co insonta mataponënhuëꞌ. Huaꞌanën chachin oꞌmaquë huarëꞌ co nanitapaponënhuëꞌ. Ina oꞌmahuachin, yaꞌipi nacionoꞌsari natëpona huachi.

‘Quëmaso Cosi, iꞌsha yonsanquë huayo huanirinso pochin ninan. Inasoꞌ huayo paꞌpi notohuaroꞌ nitërin. Sëꞌpaquënpitantaꞌ, paira paꞌtërin. Pëꞌchinan camayoroꞌsaꞌ, noꞌhuirinquën. Noꞌhuitënën pëꞌchinan shinërëquë yaohuaninën. Napotatënën, co noya quëran yaꞌhuëchináchinhuë nitarinën.

Quëmaso nipirinhuëꞌ, chini chiníquën tanpatëran. Pëꞌchinanënquë inimicoroꞌsa tëꞌyanantohuatan, co pacoitaranhuëꞌ. Yosë imarahuësoꞌ, chini chiníquën nanantërin. ¡Ina catahuarinquën inimicoroꞌsa minsëaran! Siniorosoꞌ ohuica huaꞌanën pochin niꞌton, aꞌpairinco. ¡Ina chachin quëmanta aꞌpaiatënquën catahuarinquën! Yosënëhuë chachin, catahuapënquën. Inasoꞌ, yaꞌipi nanitapaton catahuapënquën. Ina nohuanton, oꞌnanpachina catahuainquën. Acoporonta iꞌ yaꞌhuërinsoꞌ, ina nohuanton pipiton catahuainquën. Pëꞌtahuanëmapita, sanapinëmapita, inapitanta huaihuachina catahuain.

‘Quëmasoꞌ Cota, iyaparinpita paꞌyataponën. Inimiconënpita minsëraꞌpiapon. Iyaparinpita quëran huarëꞌ moshaponën. Quëmasoꞌ conpa masho, Cota itëranquën. Paꞌpiniaꞌhua pochin chinimiatëran. Mapintahuaton paꞌpiniꞌ pëꞌinihuachina, mónsho mónsho tërarinquëran quëhuënin huachi. Panca paꞌpiniꞌ pochin ninan. ¡Paꞌpiniꞌ chinotasoꞌ, co incari tëranta apisarinhuëꞌ! Inapochachin quëmanta inimiconënpita nitaponën.

‘Quëmasoꞌ Nopino, paninanquën. Chiníquën nisoco, yaꞌnan huiꞌnahuananquënsoꞌ. Chini chiníquën nanantaton, noya noya nicamasoꞌ ninan. Inapocamaso nipiranhuëꞌ, co huachi inapoaranhuëꞌ. Iꞌ paꞌpi chiniiꞌ nipachina, co onpo asanoirëhuëꞌ. Ina pochachin nicaton cosonanëhuë monshitëran,’ itërin.