Popular Bible Verses from 2 Corintios 9

Share

Yosë yaꞌipi nanitaparin. Nosoroatënquëmaꞌ, naꞌcon catahuarinquëmaꞌ noya nicacamasoꞌ. Nani tahuëri catahuarinquëmaꞌ. Ina catahuahuachinquëmaꞌ, noya cancantaramaꞌ. Ina nohuanton, yaꞌhuëtarinquëmaꞌ aꞌnapitantaꞌ quëtacaso marëꞌ.

Yaꞌipinpoaꞌ canpoara nohuanton, quëtahuaꞌ. Onposona yaquëtohuachin, quëchin. Ama nisha nisha yonquiaꞌhuasohuëꞌ. Co apiquëran quëtacasoꞌ yaꞌhuërinhuëꞌ. Noya cancantatëhuaꞌ, quëtahuaꞌ. Ina pochin quëtohuatëhuaꞌ, Yosë noya niꞌsarinpoaꞌ.

Isontaꞌ yonquicoꞌ: “Piꞌpian shaꞌtohuatëra, piꞌpian manëꞌ. Pancana shaꞌtohuatëra, naꞌcon manëꞌ,” topi.

Niꞌcoꞌ. Yosë nohuanton, yaꞌpirin yaꞌhuërin shacacaso marëꞌ. Shaꞌpatëra, ina nohuanton, naꞌa papotërin capacaso marëꞌ. Inapochachin ina nohuanton, maꞌsha yaꞌhuëtarinquëmaꞌ. Aꞌnapita topinan quëtohuatamaꞌ, Yosë catahuarinquëmaꞌ noya noya cancantacamaso marëꞌ. Noya catahuahuachinquëmaꞌ, aꞌnapitantaꞌ catahuaramaꞌ. Co apiratatomahuëꞌ, quëtaramaꞌ. Pahuantërinsopita quëtonpatoi, “Yosparinquën, Sinioro,” tosapi.

Yosëso nipirinhuëꞌ naꞌcon naꞌcon quëtërinpoaꞌ. Huiꞌnin chachin aꞌpaimarin nichaꞌëinpoaso marëꞌ. Inasoꞌ noya nóya niꞌton, “Yosparinquën, Sinioro,” itahuaꞌ.