Popular Bible Verses from Romanos 8

Share

Pues canata que Cadiosir axin uche tua' aquetpa imb'utz tunor lo que ayan tua' tin e uyajta ut e Dios y xe' pejcna umener tua' aquetpa tua'.

Y tamar era nen innata ixto ya' que matuc'a uyub'i ulocsion tama uc'unersiaj e Dios. Machi uyub'i e chamer, y machi uyub'i e cuxtar, y machi uyub'i e sian angelob', y machi uyub'i tin e ayan uc'otorer, y machi uyub'i e sian mab'amb'an mein, y machi uyub'i lo que ayan ticoit coner, y machi uyub'i lo que watar ejc'ar. Matuc'a uyub'i ulocsion tama uc'unersiaj e Dios. Y machi uyub'i lo que ayan tichan, y nien machi uyub'i lo que ayan ejmar, y nien machi uyub'i lo que chena umen e Dios. Matuc'a uyub'i ulocsion tama e c'unersiaj lo que Cadiosir ixin uwirsion tama e Cristo Jesús xe' jax Cawinquirar.

Pues entonces b'anon ub'an porque injayjayon y tamar era uc'ani tua' cacojco tz'ustaca tua' cach'ami e tacarsiaj lo que c'ani uyajc'on Unawalir e Dios. Porque machi canata cocha tua' cac'ajti taca e Dios tamar lo que intam macuir cawalma, pero Unawalir e Dios uwira tunor era y axin uc'ajti taca e Dios ticab'a taca e ajcner xe' ma erer arob'na tama inte' ojroner.

Entonces ¿tuc'a tua' caware tama tunor era? Cocha turu tacaron Cadiosir, ¿tuc'a tua' achena capater umen tin e aq'uijna uwiron?

Pues entonces coner era e Dios machi ixto tua' uchion juzgar jay intera cab'ijnusiaj taca e Cristo Jesús, y jay machi war cache b'an cocha uyusre uche cawerir, sino que war caxana b'an cocha uc'ani Unawalir e Dios.

Pues tin e c'ani uche jax taca lo que uc'ani uwerir war aq'uejcha axin tut e chamer, pero tin e uturb'a ub'a tua' uche lo que uc'ani Unawalir e Dios war aq'uejcha axin tut e cuxtar xe' machi tua' ac'apa y tut e jiriar.

Pero tama tunor lo que war canumse cab'a cocha era war caq'uec'o cawawan tacar utacarsiaj e Jesucristo xe' war uyajta coit.

Pues imb'ijnu nen que lo que war canumse cab'a tara tor e rum majax nojta conda cab'ijnu cob'a nuxi tawarer xe' tua' cach'ami tua' e Dios conda cac'otoy tut jaxir.

¿Chi entonces uyub'i ulocsion tama uc'unersiaj e Cristo? ¿O jax ca lo que uchion canumse cab'a umen que umaxtacon e Dios? ¿O lo que intran ticoit? ¿O conda ayan chi xe' c'ani uq'uechion caxin tama e cárcel umen que umaxtacon e Dios? ¿Uyub'i ca ulocsion tama uc'unersiaj e Jesucristo tunor era? Machi. ¿O uyub'i ca ulocsion e winar? ¿O conda matuc'a cab'ujc? ¿O conda ayan lo que imb'ac'ajr uwirnar tut inte'? ¿O uyub'i ca ulocsion e chamer tama uc'unersiaj e Jesucristo? Pues matuc'a erer ulocsion tama uc'unersiaj e Jesucristo.

Y Cadiosir xe' uwira tuc'a ayan macuir cawalma unata lo que war che tunor lo que war ajcna Unawalir e Dios era, porque Unawalir e Dios war uc'ajti b'an cocha uc'ani e Dios tua' atacarnob' tin e tuob' e Dios.

Pues tunor tin e ab'ijresna umen Unawalir e Dios jax umaxtac e Dios.

Pues entonces tin e turob' tua' uchiob' lo que uc'ani uwerir war ub'ijnuob' tamar taca lo que uc'aniob' e winicob' tara tor e rum, pero tin e turob' tua' uchiob' b'an cocha uc'ani Unawalir e Dios war ub'ijnuob' tamar lo que uc'ani e Dios.

Pues Cadiosir c'ani uyajc'on xe' umaxtacon tunor e chojb'esiaj, y tamar era jaxir c'apa uyajc'on esto Uyunen tua' achamay tamaron tua' ucorpeson y machi umuqui ticoit. Y cocha uyajc'onix Uyunen xe' inte' taca ayan, entonces jaxir tua' axin uyajc'on tunor lo que ayan tacar Uyunen era ub'an.

Y jax Unawalir e Dios era ub'an xe' quetpa intera taca cawalma y xe' war uyareon tama cawalma que non umaxtacon e Dios. Y umen que umaxtacon e Dios non ub'an quetpon tua' cach'ami tunor e herencia lo que t'ab'esb'ir umen e Dios tua' uyajc'on conda cac'otoy tut. Y tunor lo que t'ab'esb'ir era umen e Dios tua' e Cristo, pero jaxir c'ani axin uxere tunor e herencia era tacaron y c'ani uxere tunor utawarer tacaron ub'an jay non canumse cab'a tacar.

Pues tin e ub'ijnuob' tua' taca uchiob' lo que uc'ani e winicob' tara tor e rum war uxejb'iob' ut e Dios, porque machi c'ani umanxujres ub'ob' tut uley e Dios y nien machi uyub'iob' tua' uchiob'.

Y tunor lo que chemb'ir umen e Dios war ucojco y war uyusre tua' uwira watar e día conda e Dios tua' uchecsu tunor umaxtac taca tunor utawarerob' tama e día conda jaxir achecta watar otronyajr.

Y non canata que esto coner tunor lo que ayan tara tor e rum xe' chemb'ir umen e Dios war unumse ub'a b'an cocha jay war a'jcna ani b'an cocha inte' ixic xe' war ac'uxun war ucojco tua' acuxpa uyar.