Popular Bible Verses from Tito 1

Share

Tob' kub'i'ij reta'am uwach ri Dios; pero ruk' ri ku'ano, kaq'alajinik na reta'am ta uwach. Ma xaqi itzel uk'u'x, aj palajiy tzij y na jinta k'ana utz ku'an chwach ri Dios.

E junoq saqil runa'oj, ronoje ri chom chwach ri Dios, ri' e lik chom chwach rire. No'j ri sachinaq runa'oj, ri na kukoj ta ri Q'ijsaq, ri' ronoje lik ch'ul chwach ma ch'ul runa'oj y ri ranima'; y jek'ula' na kuna'b'ej taj sa' ri chom y sa' ri na chom taj.

E chutaqej ri saqil Utzilaj Tzij re ri Dios k'utum chwach cha' jela' kuriq kapixab'an ruk' chomilaj k'utunik y kukoj wa' pa kijolom ri tikawex, ri kakib'i'ij na qatzij ta wa k'utunik.

Ek'u ri' ri ya'tal che ku'ana aj k'amal kiwach rutinamit ri Dios, lik chirajawaxik e jusuk' rub'inik usilab'ik cha' na jinta kach'a'tib'en re, mu'an nim chirib'il rib', na ch'i'ch'oj ta uk'u'x, na q'ab'a'rel taj, na aj ch'a'oj taj, na rayinel taj re puaq kach'ak ruk' sokoso'nik. Yey cheb'uk'ulu chi utz taq ri keb'opon chirocho, chuya'a uk'u'x che u'anik ri utz, lik chuch'ob'o chi utz ri ku'ano, chu'ana ri lik jusuk', lik chuya'a rib' puq'ab' ri Dios y lik churiqa uchajixik rib' chwach ronoje ri na utz taj.

E juna aj wach re riglesia lik chirajawaxik jusuk' rub'inik usilab'ik cha' na jinta kach'a'tib'en re. K'ola jusuk' ruk' ri rixoqil yey ri ralk'o'al chirajawaxik kikojom rub'i' ri Cristo, e kojol tzij y na katataj ta k'u chike e aj mak o e titz'itaq.