Popular Bible Verses from Esai 60

Share

I ɓee-boo gə́ Jerusalem lé ḭta! Ar ndogó ləi nduba rəa Mbata lookàr ləi ree ləm, Rɔnduba lə Njesigənea̰ ndogó dɔi’g ləm tɔ.

Ginkoji dəwje gə raŋg d’a njaa Goo néndogó’g ləi ləm, Mbaije kara d’a njaa Goo lookàr’g ləi ləm tɔ.

Aa ooje, loondul dəb rigim dɔ naŋg nee ləm, Loo gə́ ndul njudu-njudu dəb dɔ koso-dəwje’g ləm tɔ, Nɛ i lé lookàr lə Njesigənea̰ nduba dɔi’g ləm, Rɔnduba ləa ndogó dɔi’g ləm tɔ.

Yeḛ gə́ lam ba ɓa a tel to koso-dəwje gə́ tɔl-dɔg-dɔg (1.000) ləm, Yeḛ gə́ gɔ a tel to dəwje gə́ njésiŋgamoŋje ləm tɔ. Ma Njesigənea̰ m’a kɔs kudu néje neelé Mee ndəaje gə́ wɔji dɔ dee lé.

Kàr ɓa a to néndogó ləi dan kàrá el ləm, Naḭ ɓa a kar loo àr ŋgad-ŋgad dɔi’g loondul’g el ləm tɔ, Nɛ Njesigənea̰ ɓa a to lookàr ləi saar-saar gə no̰ ləm, Ala ləi ɓa a to gə́ nérɔnduba ləi ləm tɔ.

Kàr ləi a kur naŋg el ŋga ləm, Naḭ ləi kara a kwa til el ŋga ləm tɔ. Mbata Njesigənea̰ ɓa a to lookàr ləi saar-saar gə no̰ ləm, Ndɔ-kwa-ndòo-yoo ləi a dəs ŋga ləm tɔ.

Loo gə́ i oo njai-njai ndá Rɔi a leli ləm, Məəi a gər njai-njai gə kalrɔ ləm tɔ, Loo gə́ nébaoje d’a kḭ dan baa-boo-kad ree rɔi’g ləm, Loo gə́ nébaoje lə ginkoji dəwje gə raŋg d’a ree rɔi’g ləm tɔ.

Un kəmi aa ne looje gə́ gugu dɔi sub oo, Deḛ lai mbo̰ na̰ ree gə́ rɔi’g, Ŋganije gə́ diŋgam d’ḭ loo gə́ əw’g ree ləm, Ŋganije gə́ dené kara d’odo dee kag ji dee’g ləm tɔ.

Koso-dəwje ləi lai D’a to njéra né gə́ gə dɔ najee-je ləm, D’a kiŋga ɓee lé gə́ ka̰ dee gə no̰ ləm tɔ, Yee ɓa to barkəmkag gə́ ma ɓa ma̰a ləm, To kula gə́ jim ɓa ra ləm tɔ Gə mba karee ula rɔnduba dɔm’g.

Dəw a koo ta néra gə́ kərm-kərm mee ɓee’g ləi el ŋga ləm, D’a koo ta tuji gə tuji-boo dɔ naŋg’d ləi el ŋga ləm tɔ, I a kunda ri kaji dɔ ndògo-bɔrɔje’g ləi ləm, A kunda ri rɔnduba dɔ tarəwkɔgje’g ləi ləm tɔ.

Tarəwkɔgje ləi d’a to tag bə̰dəŋ ya Ɓó d’a kudu dan kàrá əsé loondul’g el Gə mba kya̰ loo kar ginkoji dəwje gə raŋg Ree gə nébaoje lə dee mee kəi’g ləi ləm, Kar mbaije lə dee gə njé’g lə dee d’a ree ne ləm tɔ.

Koso-jambalje gə́ bula digi-digi lé D’a taa ɓee ləi pəl-pəl Gə jambalje gə́ Madian gə Epa, D’a kḭ Seba ɓa ree, D’a kodo larlɔr gə néje gə́ ə̰də sululu ləm, D’a pidi ne Njesigənea̰ dɔ néreaje’g ləm tɔ.

Dəw-dɔ-ɓeeje d’a gɔl ndògo-bɔrɔ ləi gogo ləm, Mbaije lə dee d’a tel to kuraje ləi ləm tɔ, Mbata loo gə́ oŋg ram lé ɓa m’kundai ya Nɛ gə goo meekoso lemsé ləm lé M’tel m’oo ne kəmtondoo ləi.

Mee loo gə́ d’ubai keneŋ d’ya̰’i ləm, Gə d’ḛjii bəḭ-bəḭ keneŋ ləm tɔ Ar dəw kára kara teḛ rɔi’g el lé M’a kari to néra-rɔ gə́ ndɔḭ saar gə no̰ ləm, M’a kari to gə́ nérɔlel lə ŋgaka dəwje gə́ kédé-kédé ləm tɔ.

I a taa némajije lə ginkoji dəwje gə raŋg To gə́ ŋgon il ne mbà kea̰je bèe ləm, I a taa ka̰ mbaije kara togə́bè ləm tɔ. Bèe ɓa i a gər ne to gə́ ma m’to Njesigənea̰ Gə́ to njekajii ləm, gə njekoga dɔi Gə́ to njesiŋgamoŋ lə Jakob ləm tɔ.