Popular Bible Verses from Sikũn Korĩt 3

Share

Pahihti mẽ Karõja wa htipxi jakamã na hte mẽ pakamã agjê nẽ hprĩ hã mẽ pamã kapẽr o amnhĩrĩt o pa.

Ra mẽ pahte Pahihti Kris kôt amnhĩ xunhwỳr jakamã te mẽ pahte mẽ kot amnhĩ jamak pro xwỳnh kot amnhĩ nhĩpêx pyràk kêt. Nhũm Pahihti Karõja tanhmã mẽ panhĩpêx to pu mẽ ra hkôt amnhĩ nhĩpêx mex o mõ. Jakamã na htem mẽ pahte amnhĩ nhĩpêx nyw pumunh kôt Tĩrtũm kot tãm amnhĩ nhĩpêx ã omunh kurê kumrẽx. Kormã mẽ pahte hkôt amnhĩ nhĩpêx mex kumrẽx kêt tã ra hkôt amnhĩ nhĩpêx mex o mõ. Jao te tãm kot amnhĩ nhĩpêx pyràk o amnhĩ nhĩpêx o mõ.

Tã koja mẽ hkwỳjaja Pahihti Jejus Kris kôt amnhĩ xunhwỳ nhũm amnhĩ tã omu nẽ te kot mẽ hamak nê hpro xà hpyr nẽ mẽnh pyràk o mẽ hipêx nhũm mẽhprĩ hã kapẽr nyw mar tỳx nẽ.

Nom amnhĩ krã hkôt mẽ ahkre hkêt nẽ. Tanhmã kot pa we amnhĩ to nẽ amnhĩ krã hkôt mẽ kãm kapẽr o mẽ ahkre mex nẽ? Nà Tĩrtũm pix na hte ja kaxyw tanhmã ixkrã hto pa ô ri mẽ ahkre ho ri ixpa. Nẽ Tĩrtũm na hte tanhmã ixkrã hto pa Karõ nhỹ hã mẽ piitã mẽ kãm kapẽr nyw jarẽnh o ri ixpa. Amnepêm Tĩrtũm kot Ijaew mã mẽmoj tã karõ xwỳnhta. Mojes kot kapẽr tũm jarẽnh o pa xwỳnhta mex tã no nhũm mẽ tee ri hkôt kãm amnhĩ nhĩpêx prãm o pa. Nẽ xatã kamã harẽ nẽ omunh tã tee ri kot hkôt kãm amnhĩ nhĩpêx prãm. Tã mẽ kot hkôt amnhĩ nhĩpêx kêt mỳrapê na prem pikaprãr pan hapêx. No kêt Tĩrtũm kapẽr nywja. Jejus jarẽnhja. Na hte Tĩrtũm Karõ tanhmã mẽ pahkrã hto pu mẽ Jejus kôt amnhĩ nhĩpêx o ri papa. Jao mẽ pahpê pahtĩr tũm nẽ papa mã xwỳnh. No na hte nhãm mẽ hkwỳjaja kãm harẽnhja mar prãm kêt nẽ amnhĩ jarẽnh o: —Nà kot paj amnhĩ krã hkôt ã amnhĩ nhĩpêx anẽ nẽ ã amnhĩ nhĩpêx anẽ nhũm Tĩrtũm ja hã ixpumu nẽ ixtĩr tũm nẽ ixpa mã xwỳnh ã ijarẽ. Anhỹr tã no ãm ã amnhĩ jarẽnh anhỹr kaprỳ. Tĩrtũm Karõ nhỹ hã mẽ kot amnhĩ to mex o mẽ pa xwỳnh pixjaja koja mẽ htĩr tũm nẽ pa ho pa.