Popular Bible Verses from Tito 3

Share

Na ruc' ta c'u ri', ri Dios Kacolobenel xuc'ut ri relej uc'u'x y ri rutzil uc'u'x chique conoje ri ticawex che ruwachulew. Xojucolobej c'u ri', na ruma ta juna chac lic utz ka'anom, ma e ruma ri c'axna'bal uc'u'x chike. Xojuch'aj c'u che ri kamac cha' cuya jun c'ac' c'aslemal chike y xuya ri Santowilaj Ruxlabixel pa kanima' cha' cujalc'atij ri kabinic kasilabic. Ruma ri Kacolobenel Jesucristo, ri Dios xuya ri Ruxlabixel chike yey ¡lic nim ruto'bal Rire kuc'! U'anom c'u jusuc' chike ruma ri unimal rutzil uc'u'x cha' cakac'ul na ri koye'em, wa' e ri kac'aslemal na jinta utakexic.

Chacuxtaj chique conoje ri quicojom rubi' ri Kanimajawal Jesucristo, lic chirajawaxic e caquinimaj y caquitakej ri caquibi'ij ri e takanelab y ri e aj k'atal tzij re ri tinamit yey caquiya quib che u'anic janipa tak ri utz. Chabi'ij chique mech'a't chirij junok, mech'o'jinic; quic'utu ri rutzil quic'u'x y qui'ana ch'uti'n che quib chiquiwach conoje tak ri ticawex.

Ma'an c'u awe'at cuc' tak ri caquichapala' quib ruc' tak ch'a'tem na jinta uchac, ri caquichololej quibi' ri cati'-quimam re ojertan y ri quech'o'jin puwi ri tzijpixab que ri aj judi'ab. Ma ronoje tak wa' na jinta que'elawi y na jinta cutikoj.

We c'o c'u junok cujach quipa tak rutinamit ri Dios, chach'a'bej upa julajok o calajok. No'j we lic na cucoj ta c'u tzij, mawachbilaj chic.