Popular Bible Verses from Apocalipsis 13

Share

Wa' lic caraj na'oj cha' camajtaj usuc'. China c'u ri lic cumaj usuc', e churajilaj ri rajlibal ri nimalaj itzel chicop, ma ri rajlibal e re jun ticawex; yey ri rajlibal e wa': 666.

Xquilok'nimaj c'u uk'ij ri nimalaj itzel chicop conoje ri winak che ruwachulew, ri na jinta quibi' chupa ri libro re c'aslemal re ri K'apoj Bexex, ri Jun chwi lo ri jekebal re ruwachulew cha'om chi lok re cacamisaxic.

Yey wa uca'm nimalaj itzel chicop xtakan che cacoj jun retalil chique conoje ri winak, wa' e tak ri lic c'o quiwach y ri na jinta quiwach, ri beyomab y ri e niba'ib, ri elok'otal ruma cajaw y ri na e jinta puk'ab juna cajaw; chique c'u conoje xcoj wa jun retalil che ri quik'ab uwiquik'ab o che rucurusil ri quipalaj. Jec'ula', na jinta junok ya'tal che calok'owic o cac'ayinic we na cojom ta che rire ri jun retalil, wa' e rubi' ri nimalaj itzel chicop o ri rajlibal rubi'.

China ri ya'tal che cac'am bi chi presoyil, ri' cac'am na ubi; y china ri ya'tal che cacam ruc' espada, ri' ruc' espada cacamisaxic. E uwari'che chirajawaxic wi rutinamit ri Dios caquichuk'ubej quib chwach ri c'axc'obic y caquitiquiba' ri cubulibal quic'u'x ruc' ri Dios.

Ri'in xintaq'ui' chwi ri sanyeb chuchi' ri mar y xinwilo echiri' chupa ri mar xel lo jun nimalaj itzel chicop wukub rujolom y lajuj ri ruc'a'. Chujujunal rujolom cojom jun diadema che y chujujunal ri wukub ujolom tz'ibital jun bi'aj re c'akibal bi uk'ij ri Dios.

Y xya' c'u puk'ab cach'o'jin chiquij rutinamit ri Dios y cuch'ij quichuk'ab. Jenela' xya' puk'ab catakan paquiwi conoje tak ri tinamit, conoje ruq'uiyal quiwach tak ri ticawex che ronoje ruq'uiyal uwach ch'a'temal.

Quebusoc c'u conoje ri winak ruc' tak ri c'utubal ya'tal che cu'an chwach ri nabe nimalaj itzel chicop. Y quebutak ri winak cha' caqui'an jun uc'axwach ri nabe nimalaj itzel chicop, ri lic x'an c'ax che ruc' espada yey na xcam taj. Y xya'taj c'u che cuya uc'aslem ruc'axwach ri nabe nimalaj itzel chicop, cha' jela' utz cach'awic y cutak quicamisaxic conoje ri winak na caquilok'nimaj ta uk'ij.

Wa nimalaj itzel chicop jela' catzu'nic pacha' juna balam, yey tak ri rakan e pacha' rakan oso y ruwa re' e pacha' uwa re' coj. Ec'u ri dragón xuya uchuk'ab ri nimalaj itzel chicop, xuya rutz'ulibal re takanic che y lic xuya uwach.

Xya'taj che ri nimalaj itzel chicop cutac'aba' uk'ij y lic tzel cach'a't chirij ri Dios. Y xya' c'u uchuk'ab re catakan che ruwachulew oxib junab ruc' nic'aj.

Xinwil c'ut, lic 'anom c'ax che jun chique tak rujolom ri nimalaj itzel chicop, yey lic cajec'ow ruc'. Pero wa' wa c'ax xcunutajic y ruma c'u ri' conoje ri winak che ruwachulew lic xcam canima' che y e xquitakej ri nimalaj itzel chicop.

Tec'uchiri', xinwilo echiri' jun chic nimalaj itzel chicop xel lo chupa ri juyub tak'aj, c'o c'u ca'ib ruc'a' pacha' ruc'a' juna k'apoj bexex pero cach'a't pacha' juna dragón. Yey wa uca'm nimalaj itzel chicop xya' puk'ab catakan pacha' ri nabe nimalaj itzel chicop y cu'an c'u rutakanic chwach. Xebutak c'u conoje ri winak che ruwachulew cha' lic caquilok'nimaj uk'ij ri nabe nimalaj itzel chicop, ri xcunutaj che ri jun c'ax xjec'ow ruc'.