Popular Bible Verses from 1 Tesalonicenses 5

Share

E lic xaki qui'cota alak. Chipak'ij chichak'ab 'ana alak orar. Tioxin c'u alak che ri Dios chupa tak ronoje ri quic'owibej alak, ma e caraj ri' ri Dios che onoje alak ri cojom alak rubi' ri Kanimajawal Jesucristo.

Ec'u ri Dios ri aj ya'l utzil chomal, lic chuchomaj ri binic silabic alak cha' ronoje ri c'aslemal alak ruc' ri c'u'x alak y ri cuerpo alak chajital chi utz che ronoje ri na utz taj, cha' jela' na jinta c'ana mac alak echiri' cac'un tanchi ri Kanimajawal Jesucristo. E ri Dios siq'uiyom e alak che jun santowilaj binic silabic; yey Rire lic jusuc', ma cuya na ronoje ri to'bal ubi'tisim che alak cha' cabin alak jusuc'.

We c'o junok u'anom ri na utz taj che alak, ma'an alak uc'axel che. E tijoj ib alak che u'anic ri utz chiwach alak y chiquiwach conoje.

Ruma c'u ri', bochi'ij c'u'x alak y nimarisaj c'u'x alak chiwach alak, jela' pacha' ri catajin alak che u'anic.

Cakatz'onoj che alak hermanos, chepixabaj alak ri na jinta c'o cacaj caqui'ano. Nimarisaj alak quic'u'x ri na jinta ucowil quic'u'x. Cheto'o alak ri na jinta quichuk'ab chwach ri Dios. C'ola unimal c'u'x alak cuc' conoje ri e c'o uc' alak.

Ma ri Dios na xojucha' taj cha' e cakac'ul ruk'atbal tzij pakawi'; ma e xojucha'o re cakac'ul ri colobetajic ruma ri Kanimajawal Jesucristo

Ma onoje ralak cabin alak chupa ri K'ijsak y alak re ri pak'ij. Ralak y ri'oj na oj ta re ri chak'ab, ma na oj jinta chi pa ri k'eku'malil.