Popular Bible Verses from AISEA 60

Share

Mo tu cake, mo rarama mai; ni sa yaco mai na nomu rarama, ia na serau i Jiova sa cadra mai vei iko.

ia na veimatanitu tani era na lako voli e na nomu rarama; kei ira na tui, e na serau ni kemui cadracadra.

Io, raica, na butobuto, ena ubi vuravura; kei na butobuto loaloa, na veimatanitu; ia ena cadra mai vei iko ko Jiova; kei na nona serau, ena raici ni sa cilavi iko

Ko koya sa lailai, ena yaco me le dua na udolu; kei koya sa lailai, me matanitu kaukauwa: koi au ko Jiova, ka'u na vakusarawataka e na kena gauna.

Na mata-ni-siga ena sega tale ni nomu rarama e na siga; na vula talega, ena sega ni cila mai me nomu rarama: ia ko Jiova ga, ena nomu rarama ka sega ni mudu; kei na nomu Kalou, ena nomu i ukuuku.

Ena sega ni dromu tale na nomu mata-ni-siga, na nomu vula talega ena sega ni dromu: ni na nomu rarama ko Jiova ka sega ni mudu, ia ena oti ga na siga ni nomu tagi.

Ko na qai raica, ka vakamarautaki; ia na lomamu, ena vakacegu ka vakalevutaki; ni na vakalesui mai vei iko na kamunaga ni wasawasa; ia nai yau ni veimatanitu, ena rawa mai vei iko.

Ta cake, ka rai voli: ko ira kece, era sa soqoni vata, era sa lako mai vei iko; a luvemu tagane, era na lako vakayawa mai; kei ira na luvemu yalewa, era na roqoti mai.

Ko ira na nomu tamata, era na yalododonu kecega: era na taukena na vanua ka sega ni mudu, na sulina ka'u a tea, na cakacaka ni ligaqu, me'u vakarokorokotaki kina.

Ena sega ni rogoci tale e na nomu vanua, nai valavala kaukauwa, se na rarawa se na rusa e na nomu i yalayala; ia ko na vakatoka na nomu bai me bai ni Bula, kei na nomu matamata-ni-koro me matamata-ni-koro ni Vakavinavinaka.

Ia na nomu matamata-ni-koro ena dola tikoga; ena sega ni sogo e na siga se na bogi, me kau mai kina vei iko nai yau ni veimatanitu, ka me ra tuberi mai ko ira talega na nodra tui.

A qele ni kameli ena lako levu mai vei iko; na luve ni kameli ni Mitiani kei Ifa: ko ira kecega mai Sipa, era na lako mai; era na kauta mai na koula kei na ka boi vinaka; ka ra na vakacaucautaki Jiova e na nodra i tukutuku vinaka.

Era na viria na nomu bai ko ira na kai tani, ia ko ira na nodra tui era na qaravi iko: ni'u a cudru, ka'u a yaviti iko, ia ni'u sa yalololoma, ka'u na lomani iko.

Ia, ni ko a biu ka cati, ka sega e veilakovi kei iko, ka'u na qai qisi iko kina mo lagilagi ka sega ni mudu, mo vu ni marau vei ira na veitabatamata kecega.

Ko na sucuma na nodra wai-ni-sucu na veimatanitu tani, ia na sucudra na tui ko na sucuma: ko na qai kila ni sai au ko Jiova na nomu i Vakabula, ni sai Koya ka voli iko na Kaukauwa nei Jekope.