Popular Bible Verses from 1 SAMUELA 17

Share

Sa qai kaya vua na kai Filisitia ko Tevita, Ko sa lako mai vei au ka vakaiseleiwau, ka vakamoto, ka vakaisasabai: ia koi au, ka'u sa lako mai vei iko e na yaca i Jiova ni lewe vuqa; o koya na Kalou ni nodra mataivalu na Isireli, o ira ko a daubolea.

ka me ra kila talega kina ko ira nai vavakoso taucoko oqo ni sa sega ni ia na veivakabulai ko Jiova e nai seleiwau kei na moto; ni sa lewa nai valu ko Jiova, ka na soli kemuni talega ko koya ki na ligaimami.

A sa kaya talega ko Tevita, Ko Jiova, o koya ka vakabulai au mai na liga ni laioni, kei na liga ni pera, ena vakabulai au ko koya mai na ligana na kai Filisitia oqo. A sa kaya vei Tevita ko Saula, Mo lako, ia ena lako vata kei iko ko Jiova.

E na siga oqo ena soli iko ko Jiova ki na ligaqu; ia ka'u na yaviti iko, ka tamusuka laivi na ulumu; au na solia talega na yagodra nai valu ni kai Filisitia e na siga oqo ki na manumanu vuka, kei na manumanu tawa lasa ni vanua; me ra kila ko ira kecega na kai vuravura ni sa dua na nodra kalou na Isireli

A sa taura e na ligana na nonai titoko, a sa digitaka e lima na vatu mulo mai na uciwai, ka tugana ki na taga ni vakatawa ni sipi sa kauta ko koya, io e na nona taga; ka sa taura e ligana na nonai rabo: a sa la'ki toro yani vua na kai Filisitia.

A sa kaya vei Saula ko Tevita, Me kakua ni yalolailai e dua na tamata e na vukuna; koi au na nomuni tamata au na lako, ka vala kaya na kai Filisitia oqo.