Popular Bible Verses from 1 يُوحَنَّا 3

Share

يَا عِيَالِي، خَلِّي مَا نِرَّايَدَوْا بِكَلَامْ خُشُومْنَا بَسْ لَاكِنْ خَلِّي نِرَّايَدَوْا بِالْفِعِلْ وَ بِالْمَحَبَّةْ الصَّحِيحَةْ.

عِيسَى الْمَسِيحْ فَدَانَا بِرُوحَهْ وَ دَا بَسْ وَصَّفْ لَيْنَا مَعَنَى الْمَحَبَّةْ. وَ خَلَاصْ، وَاجِبْ نِحِبُّوا أَخْوَانَّا لَحَدِّي نَفْدَوْهُمْ بِرُوحْنَا.

شِفْتُوا كِكَّيْف أَبُونَا يِحِبِّنَا؟ مَحَبَّةْ اللّٰهْ لَيْنَا كَبِيرَةْ بِلْحَيْن وَ بِسَبَبْهَا هُو يِنَادِينَا عِيَالَهْ. وَ صَحِيحْ بِقِينَا عِيَالْ اللّٰهْ. نَاسْ الدُّنْيَا مَا عِرْفَوْنَا أَشَانْ مَا عِرْفَوْا اللّٰهْ.

وَ أَيِّ نَادُمْ الْقَاعِدْ يِسَوِّي ذَنِبْ، هُو هَنَا إِبْلِيسْ أَشَانْ إِبْلِيسْ قَاعِدْ يَذْنِبْ مِنْ الْبِدَايَةْ. وَ خَلَاصْ إِبْن اللّٰهْ جَاءْ فِي الدُّنْيَا أَشَانْ يَخْرِبْ عَمَلْ إِبْلِيسْ كُلَّ كَيْ.

النَّاسْ الْبِقَوْا عِيَالْ اللّٰهْ مَا يَذْنُبُوا أَشَانْ طَبِيعَةْ اللّٰهْ قَاعِدَةْ فَوْقهُمْ. مَا يَقْدَرَوْا يَذْنُبُوا أَشَانْ بِقَوْا عِيَالْ اللّٰهْ.

كَنْ نَادُمْ عِنْدَهْ مَالْ الدُّنْيَا وَ يِشِيفْ أَخُوهْ تَعْبَانْ وَ يِسِدّ عَيْنَهْ وَ مَا يِسَاعِدَهْ، كِكَّيْف نُقُولُوا مَحَبَّةْ اللّٰهْ قَاعِدَةْ فَوْقَهْ؟

كُلَّ النَّاسْ الْيِتَابُعُوا وَصِيَّاتَهْ قَاعِدِينْ ثَابْتِينْ فَوْقَهْ وَ هُو قَاعِدْ ثَابِتْ فَوْقهُمْ. وَ نَعَرْفُوا أَكِيدْ كَدَرْ هُو قَاعِدْ ثَابِتْ فَوْقنَا وَ دَا نَعَرْفُوهْ مِنْ الرُّوحْ الْقُدُّوسْ الْهُو نَزَّلَهْ فَوْقنَا.

وَ نَعَرْفُوا يَاتُمَّنْ عِيَالْ اللّٰهْ وَ يَاتُمَّنْ عِيَالْ إِبْلِيسْ بِالشَّيّءْ الْيِسَوُّوهْ. كُلَّ النَّاسْ الْمَا يِتَابُعُوا الْحَالْ الصَّالْحَةْ، هُمَّنْ مَا عِيَالْ اللّٰهْ مِثِلْ النَّاسْ الْمَا يِحِبُّوا أَخْوَانْهُمْ.

دَاهُو الْكَلَامْ السِّمِعْتُوهْ مِنْ الْبِدَايَةْ. وَاجِبْ نِرَّايَدَوْا أَمْبَيْنَاتْنَا.

يَا أَخْوَانِي، مَا تِعَجُّبُوا كَنْ نَاسْ الدُّنْيَا يَكْرَهَوْكُو.