Popular Bible Verses from 2 Kuruntus 5

Share

Wa kan ayyi naadum indah alaakha maʼa l-Masiih, hu bigi khaliige jadiide. Hayaatah al-gadiime faatat wa hayaatah al-jadiide badat khalaas.

Wa l-Masiih al-abadan ma aznab, Allah jaʼalah dahiiye fi chaan zunuubna achaan aniina nabgo beyah chaʼab Allah al-saalihiin.

Laakin niʼiichu hasab al-cheyy al-aniina muʼminiin beyah wa ma hasab al-nichiifuuh be eenna.

Wa da kulla ke, jaayi min Allah. Hu bas sawwa al-suluh maʼaana be l-Masiih. Wa l-khidme al-Allah kallafaana beeha, hi ballikhiin khabar al-suluh. Wa maʼanaatah Allah sawwa al-suluh be waasitat al-Masiih. Wa hu chaal niiye achaan ma yihaasib naas al-dunya hasab khataayaahum. Wa kallafaana be ballikhiin bichaarat al-suluh.

Wa be misil da, ana wa akhwaani bigiina sufara le l-Masiih wa Allah gaaʼid yinaadiiku be lisaanna. Wa khalaas, natulbu minku be usum al-Masiih, assaalaho maʼa Allah.

Wa hu maat le kulla l-naas achaan al-naas al-hayyiin ma yiʼiichu battaan le nufuushum laakin yiʼiichu le l-Masiih al-maat wa baʼas fi chaanhum. Achaan da, min al-yoom le giddaam ma nifakkuru fi ayyi naadum misil al-naas yifakkuru foogah. Awwal aniina fakkarna fi l-Masiih misil al-naas. Laakin abadan ma nifakkuru foogah battaan misil da.

Wa mahabbat al-Masiih leena tajburna achaan aniina muʼakkidiin kadar hu al-waahid al-maat fi chaan kulla l-naas wa beyah hu bas, kulluhum maato.