Popular Bible Verses from Ex 10

Share

Re' QaJaaw Dios je' wili i xuq'or reh i Moisés: Yu'naak hiy wo' chik ruuk' i reey, re' i hin xnukowb'isaj i ránima i reh, je' wo' taqe i kikamanik ruuk', reh chi konaa nuk'uhtaam i nimaq wach i ma' ilooj taj chikiwach. Reh chi re' hat naa ak'utjaam keh aawak'uun awixq'uun, aawiih aamaam chib'ih i xnub'an kuuk' i aj Egipto. Je' wo' hoq i ma' ilooj taj xnub'an kuuk', reh chi nee taq i nanaab'eej i hat chi re' hin i Dios, inki.

Re' QaJaaw Dios je' wili i xuq'or reh i Moisés: Chajosaj johtoq aq'ab' pan taxaaj reh chi neenchalik i runimaal q'equm chinaah chu'nchel i rutinamitaal i Egipto, naakilom chixiik'naah q'equmaal, inki. Eh re' i Moisés xujosaj wo' johtoq i q'ab' pan taxaaj xchalik wo' runimaal q'equm chinaah chu'nchel i rutinamitaal i Egipto. Re' re' ixib' q'iij xub'an chinaah i wach ak'al, eh xama' nkilow ta chik i kika'jaah, xama' kik'uyu'jik ta chik pan kiye'aab'. Eh chupaam i ye'aab' wilkeeb' wii' taqe i aj Israel ma' xq'equmrik taj.

Eh re' i Moisés xuq'eb'aa' reje i rukarote chinaah i tinamit Egipto, re' QaJaaw Dios xuyeew chaloq i kowlaj teew parelb'aal q'iij xhupinik chinaah chu'nchel i tinamit Egipto. Xik'ik q'iij, xik'ik aq'ab', eh noq saq'ik chi junwaar, re' i kowlaj teew re' re' xuk'am chaloq i ma' k'isa nimaq chili'l. Xinujik chupaam chu'nchel i tinamit Egipto, eh xti ma' k'isiin wo' chik kik'ihaal i nimaq chili'l re' re' ma' jank'al ta nilarik chi je' re', eh ma' naa ta wo' chik rilariik chi jumpech.