Popular Bible Verses from Ecl 1

Share

Ruum awach i, ma' k'isiin runa'ojb'al ma' k'isiin wo' ruk'axkiil inchalik. Eh wila' ma' k'isiin reht'al ma' k'isiin wo' i ti' inchalik chinaah.

Re' taqe i wilkeeb' cho najtir xa re' wo' re' i wilkeeb' yu'naak. Re' i korjinaq cho najtir xa re' wo' inkorjik yu'naak, ma' xta chik jino'q i ak' inkorjik, chinaah i wach ak'al.

Eh chu'nchel i xa chib'ih jariik, xaneenb'aan q'uhtik reh, ma' nee ta inkan i q'orik reh i ruq'orariik, atoob' ta nee rilow inaq'qawach, neerib'iraj i qaxikin, xama' nee ta wo' inch'iklojik k'uxliis.

Chib'ih imb'aan, chib'ih i wilik wach ak'al xama' xta ruk'am chaloq, eh xti korik noq chu'nchel i re' ma' xta ruk'am chaloq. ¿Chib'ih neeruk'ax i winaq chi rajlaal i q'iij neeruk'at riib' chi kamanik chuwach i rutz'ahiil i q'iij?

Eh re' hin xnukoj rehtaal chi chu'nchel imb'aan ayu' wach ak'al xama' xta ruk'am chaloq, xa je' rukab' noq neenajawjik ruchopariik i teew.

Re' taqe i k'achareel kikimik, eh wilik wo' chik i ki-aasjik. Eh kikimik wo' chik reje, eh re' wach ak'al xama' njaljik ta wo' wach.

Chu'nchel i b'anooj cho najtir xsahchik pank'uxliis, eh chu'nchel i k'ahchi' yu'naak, chu'nchel i naa rub'aan na' chub'an naa wo' rusahchiik, pank'uxliis.

Re' hin xnuchop nuk'ux chureqariik ruman i nuna'ojb'al, eh xwaaj naq nureqem chi riij i memil, i sah cheel laj na'ojb'al. Xa re' la' re' taqe i re' xama' xta ruk'am chaloq xaruti'kiil k'uxliis inki yeew.