Popular Bible Verses from Dt 6

Share

Chamc'ojlejc Jehová qui Diosalec yet' smasnil e c'ojol, yet' smasnil e nab'en yet' smasnil eyip.

'A junjn c'u, tze cuyn eb' eyunnal 'a jun tzo'n̈ paxti tic. Tzeyalb'tan̈j 'a yol eyatut, 'a yol b'e, 'a yic tzex waycn 'ejmi yet' pax 'a yic tzex q'uexwa'an.

A jun tzo'n̈ paxti tzwalcn 'ayx tic, molc can 'a e nab'en.

'Ab'tec wal ex wit israelal, cojn Jehová qui Diosalec, may junc xo.

'A'c 'och jun tzo'n̈ checnb'il tic 'a e c'ab' yet' 'a snan̈l e sat, 'icha to ch'oxnb'il tz'ajch 'ayex.

Tz'ib'jec 'och 'a spiralil eyatut yet' 'a spuertail e chon̈ab'.

Cojn 'a Jehová Dios tzex xiwi, a tzeyac' servil. Cojn sb'i tze b'inej, yic tze ya'n junc e ti'.

A Jehová qui Diosalec, a 'oj eyi'n 'och 'a sat lum lum 'aj ya'jnac sti ya'n 'a eb' qui mam quichmec, atn 'a Abraham, Isaac yet' 'a Jacob. A jun lum cha, caw niwc jun tzo'n̈ chon̈b' 'ay 'a 'a, caw wach' pax yilxi, palta man̈oc ex e b'ojnac. A eb' te n̈a 'ay ta', b'ut'n yet' tas wach' 'ay 'a yojol, palta man̈oc ex b'ut'jnac. 'Ay a 'uc'b'il a joyb'il, palta man̈oc ex joyjnac. 'Ay te uva yet' te olivo 'awb'il ta', palta man̈oc ex 'awjnac. Toxn̈ej 'oj e c'ux tas 'ay 'a jun lugar cha, ax e b'ut'j wal si'mb'il. A yic 'oj 'el'choc jun cha, tzeyil wal e b'a, xeya't wal sat e c'ojl 'a Jehová, yujto a on̈ 'i'nec 'elt 'a Egipto 'a 'aj 'ayn̈ec 'och mosoal.

'Ix yaln pax Moisés 'ixtic: Atn wal jun tzo'n̈ checnb'il tic, ley yet' cuynb'il tzyac' Jehová qui Diosalec wal 'ayex, sec a jun tzo'n̈ tic 'oj e b'eylb'oc 'a sat lum lum 'oj eyico'oc cha. Yic wach' 'oj e xiw 'a Jehová qui Diosalec, 'oj eyiclc smasnil schecnb'il, sley yet' smasnil scuynb'il yic 'ayx 'ec' 'a yolyib'n̈q'uinl tic yet' eyunnal, eyiechiquin, sec 'oj najtxb'oc e q'uinal.

A cab' tas wach' tze b'o'o. Tojln̈ej cab' tzeyutj e b'a 'a sat Jehová, sec wach' tzex 'el'chi, ax eyica'an lum lum 'aj ya'jnac sti ya'n 'a eb' qui mam quichmec.

A Jehová qui Diosalec 'ayc' wal 'a qui calec, 'ay smay tzcot yowl 'ayex. Toto tzeyal e b'a 'a jun tzo'n̈ comn dios cha, ax ex satn 'el 'a jun 'ejmn̈ej 'a sat lum lum cha.

Man̈ ex 'och tza'n yuj sdiosal eb' 'anma cajn 'a e tz'ey.

Man̈ eyac' prowal Jehová qui Diosalec, 'icha wal eyutjnac 'a Masah.