Popular Bible Verses from Ro 6

Share

Tatol a yobtakil chi junej, ok co cha is tojol, a ton camich yin junelnej. Palta a jun is sabal Dios chi yak' ayon, a ton co k'inal tol ayc'al yin tojbalk'inal, yujtol junxanej jayji yetok Cristo Jesús, Cham Jajawil.

A yobtakil c'amxaokab yalon yet jin, yujtol c'am onxa oc yalan yikbej ley Moisés. A yalan yikbej watx'c'ulalil Dios ayon oc tinani'.

A yuj co bautismo tu' max txecloj elok, tol max on cami, cax junxanej max yun co mukay yetok Cristo. Yuj tu' xan axca c'apax max yun yictzoj aj Cristo xol eb camnak yuj is miman mayk'ak'al co Mam Dios, axca c'apax tu' max yun jictzoj aj c'apaxok. Chi yal elapnok, a wal junok ac' beybalej chi co beybalnej tinani'.

Manchakxa co bek co mimanil yul k'ab tzet man watx'ok, cax chi junen yobtakil. Yowalil asan yul k'ab Dios chi jaoc co ba, yujtol camnak onxa yul sat, cax max on ictzonelay pax ajok. Yuj tu', jak'ek co mimanil bay Dios, yet watx' asan tzet watx' chi el junen yetok.

Jojtak, tol a tzet jayji yet yalan, a yul sat Dios, max curusnelay yetok Cristo yet watx' chi ilaycan el yikbej co yob nabal. Axca tu' max juncan elok, yet watx' manchakxa jak' serbil yobtakil tinani'.

Cayokab on tu', nachajokab el juj, tol camnak onxa, c'amxa yalon yet yobtakil jin. Co naek c'apaxok, tol iquis on, yuj jak'on serbil Dios, yujtol junxanej jayji yetok Cristo Jesús.

¿Tzet con chi che na' xin? ¿Tom mi watx', ta ac'ala' junen yobtakil, yet watx' chi yak'c'al Dios mimanc'ulal jin, cax chi texac'al txecloj el is watx'c'ulalil axca tu'? C'amak, caw wal maj je'. A yul sat Dios, camnak onxa, c'amxa yalon yet yobtakil jin. Yuj tu', ¿tom ac'ala' chi je' co beybalnen yobtakil?

Jojtak, tatol ay junok mactxel chi yak' ba yak'omalok serbil junokxa mactxel, asan jun tu' ay yalon yet yin yin junelnej. Yowalil chi yikej tzet chi yal is patrón tu'. Cayon ton tu xin. Tatol chi jak' serbil yobtakil, chi jikej tzet chi yochej, tutun tol asannej ayon yet. Axa co cam yuj tu' yin junelnej. Palta tatol a Dios chi jak' serbil, chi jikej tzet chi yochej; tatol axca tu', asannej ayon yet. Axa watx'ji oc co nabal yuj tu'.

Palta chi wal yuj diosalil bay Dios e yuj. Yujtol caxc'al max e yak' serbil yobtakil yet yalan, palta axa tinani', lanan e yiken yin masanil e c'ul juntzan cuybanilej bay max ex alaycan ocok. Max ex colchaj el yul k'ab yobtakil, manxa yak'omalok serbil e yayji tinani', palta tol yak'omalxa serbil watx'ilal e yayji.