Popular Bible Verses from Gl 5

Share

A pax Cham Yespíritu Dios xin, a' chi ak'on junej tol chi co camc'ulnen co ba, chon tzaloji, chon ayji ec' yin junc'ulal. Chi yak'on c'apax jak' techaj tzanc'al tzet chi jay jiban. Yuj Yespíritu tu' xan ay co yabenc'ulal bay eb jet animail, watx' chi jut co nabal yin eb. Yuj c'apaxok, xan yikem on. Yaynakil chi jut co ba. Yuj Cham, xan chi je' co mitx'on oc waan co ba. A juntzan watx' beybalej ti', c'am junok ley chi aloni tol c'am chi el juneni.

Chi wal c'apaxtok junxa ti' ayex. Co beybalnejek wal tzet chi yochej c'ul Cham Yespíritu Dios. Catatu' bian, man ok co beybalnej tzet chi yochej co yob ochwanilal.

A Cham Yespíritu Dios chi ak'on co k'inal tol ayc'al yin tojbalk'inal. Yuj tu', yowalil chi co beybalnej axca chi yochej Cham.

A mac on txel yetonxa Cristo Jesús, axca tol curusnebilxa co yob ochwanilal yul co sat, c'amxa yelapnok juntzan tzet man watx'ok chi jochej ocok.

A eb chi beybalnej is yob ochwanilal, caw miman txequel tzet chi el yunen eb: Chi say eb yix yul k'ab yistzil, ma chi say eb yob yul k'ab yichamil, yetok juntzanxa tzet c'am watx'il chi el yunen eb yetok is mimanil. Asanc'al tzet q'uixwiltak chi el yunen eb. Chi yal ba eb bay juntzan tzet chi yaoc eb is diosalok. Chi balnej eb junokxa mactxel. Chi yajc'ulnej aj ba eb, owalc'al ay eb. Chi yak' eb sawenal yin junok mac watx' ay. C'un tit yowal eb. Chi yochej eb tol asannej eb ay yelapnok. Chi pojchajtok eb, tx'ok tx'okxac'al bay chi el botzan eb. Chi yochej oc eb tzet ay junokxa mactxel. Chi uc'wi an eb. Chi wekeki eb, cax chi el yunen eb juntzanxa axca ton juntzan ti'. Caxc'al max wal jun ti' ayex yet yalantok, palta ti' chi waltok ayex junelxa: A eb chi el yunen juntzan chi waltek ti', tutun wal c'am jabok yalon eb yet yoc yul k'ab Dios.

Ex wuẍtak, ex wanab, awtebil ex yuj Dios, yet watx' munil e yet e ba jetok. Palta caxc'al munil jet co ba, man yujok tu', ok je' jak'balnen co yob ochwanilal. Yelxac'al watx' chi jak'lej serbil co ba, yuj co camc'ulal.

Yujtol a jun co yob ochwanilal ti', yajc'ul ba yetok Cham Yespíritu Dios. Axa Cham Espíritu tu', ajc'ul c'apax oc yin co yob ochwanilal, xan caw yajc'ul ba. Yuj tu', ijan wal c'am chi je' watx' chi jut co beybal axca chi jochej.

Masanilc'al tzet ayay yul ley Moisés, pilan chi txecloj el yin jun chekbanil ok waltek ti': Che ya'ilnej e yet animail axca che yut e ya'ilnen e ba junjun ex, ẍi.

Manchak co maynejek co ba, yet watx' c'am chi co tx'emlejek co ba. Manchak jochejek oc tzet ay junokxa jet creyenteal.

A Cristo max on colon el yul k'ab ley Moisés, yet watx' jet-xac'al co ba yetok. Yuj tu xin, caw tec'an che yut e ba. A jun ley bay colbil onxa el tu', lajan wal axca junok ikatz caw wal al. Manchakxa e chaoc e yiban e yak'lay cuenta yuj.