Popular Bible Verses from Lc 3

Share

Y xbanatej chi toq najin niqasex ya' pa kiwi' ri winaqi', chuqa' jari' toq xqasex ya' pa ruwi' ri Jesús. Y rokik rija' najin chi ch'owen rik'in ri Dios, jari' toq xjaqatej ri kaj. Ri Loq'olej Espíritu kan tz'etel-wi ri xqaqa-pe pa ruwi' ri Jesús, kan achi'el jun paloma. Xak'axatej k'a chuqa' jun ch'abel ri peteneq chila' chikaj ri nubij: Ja rat ri nuk'ajol yin ri kan janila yatinwajo', y yikikot awik'in, xcha' ri ch'abel ri'.

Roma ri' ri Juan xubij chike ri winaqi': Yin, xaxe k'a ya' ninqasaj pa kiwi' ri winaqi' toq nitzolej-pe kik'u'x rik'in ri Dios. Jak'a kan k'o jun ri xtipe ri chiqawech-apo, ri man achi'el ta ok yin. Roma yin kan man ruk'amon ta richin ninsol ri ruximibal ri ruxajab. Ri jun ri' nim ruq'ij y nim ruchuq'a', y kan xtuqasaj pa kiwi' ri winaqi' ri Loq'olej Espíritu rachibilan q'aq'.

Wi kan qitzij chi rix nitzolej-pe ik'u'x rik'in ri Dios, kan tiq'alajin k'a chupan ri ik'aslen. Man k'a tich'ob-qa rix chi kan xaxe roma ri ix riy-rumam kan ri Abraham, xkixkolotej. Roma, kan ta ri Dios nrajo', rija' yeruben ta riy-rumam ri Abraham chike re abej re yeqatz'et wawe'.

Pa ruwi' ri' nich'on-wi ri tzij: Ri ikej e ya'on chik chuxe' ronojel ri che' ri xa man nikiya' ta kiwech, richin yechoy. Ronojel k'a ri che' ri xkechoy, xkek'aq pa q'aq', nicha', xcha' ri Juan.

Kan jak'a rik'in ri Juan xbanatej-wi ri rubin kan ri Dios chire ri jun q'alajirisey ruch'abel ri Dios xubini'aj Isaías, toq xubij:*f6* K'o k'a jun q'ij k'o jun ri xtipe chupan ri tz'iran ruwach'ulew, y kan janila kow xtich'on y xtubij: Tichojmirisaj k'a jun bey richin ri Jehová. Tibana' jun choj laj bey richin ri qa-Dios. Ronojel ri ek'o pa jotol, k'o chi xketaq'ajux, y ronojel ri ek'o pa xulan, k'o chi xkenojisex. Ri xotoxeq kan xkeban taq'aj chike. Ronojel k'a xtitaq'ajux. Kan konojel winaqi' xkekolotej roma ri Jehová, nicha'.