Popular Bible Verses from Deut 8

Share

Toqaqa k'a chi ik'u'x ri Jehová ri qa-Dios roma kan ja rija' ri xtiya'on ronojel ri uchuq'a' y ri ch'obonik chiwe richin xkixbeyomer, richin nuben ri rujikiban kik'in ri qati't-qamama', achi'el re xqatz'et yan.

Stape' xuben chiqe richin xqatej wayjal, k'ari' xuteq-pe ri aj-chikajil-wey chiqe, ri ni roj ni ta ri qati't-qamama' man jun bey qatz'eton, richin nuk'ut chiqawech chi man xaxe ta rik'in wey yojk'ase-wi xa kan rik'in chuqa' ri ruch'abel ri Dios.

Y toqaqa k'a chi'ik'u'x ri tijoj-poqonal ri xqak'owisaj-pe toq xojruk'en-pe ri Jehová ri qa-Dios re kawineq juna' re', chupan re tz'iran ruwach'ulew, richin xqetamaj ta ri qasanri'il chuwech rija' y richin xojrutejtobej, chuqa' richin xretamaj ri achike k'o pa qánima y wi niqayek ri rupixa' o ni.

Man tibij-qa pan iwánima chi ronojel ri ibeyomel kan ich'akon rik'in ri isamaj y ri iwuchuq'a'.

Kan tichajij k'a iwi' richin man nimestaj ta ri Jehová ri qa-Dios, richin nitaqej ronojel pixa' ri ninya' chiwe re wakami.

Kan tiqatz'eta' k'a jebel, achi'el toq jun tata'aj nuya' ri rutojbalil rumak ri ruk'ajol, kan keri' chuqa' nuben ri Jehová ri qa-Dios, kan oj ruya'on-pe pa tijoj-poqonal.

Xkixwa-xkixuk'ya' y kan xkixch'uch'u' k'a, y kan xtiya' k'a ruq'ij ri Jehová ri qa-Dios, roma ri utzilej ruwach'ulew ri xtuya' chiwe.

Titaqej k'a ri pixa' ri ruya'on ri Jehová ri qa-Dios chiwe y kan tiya' ruq'ij y kan titzeqelibej k'a ri rutijonik ri ruya'on rija' chiwe.

Y ri chiri' xojrutzuq rik'in aj-chikajil-wey, ri man jun bey kitz'eton ta ri qati't-qamama', y chuqa' kan xojruya' pa poqon y xojrutejtobej richin utz xqaben.

Y toq k'o chik ronojel iwik'in y toq ixk'o chik chupan ri utz taq jay ri xke'ibanala-qa, y xtitz'et chi ri iwákix y ri ikarne'l xkek'iyer, y keri' chuqa' ri q'anapueq, ri saqipueq, ronojel ri beyomel y ronojel k'a ri k'o iwik'in xtik'iyer, man tiya' q'ij richin ninimirisaj-iwi' rik'in ronojel ri k'o iwik'in, richin man timestaj ri Jehová ri qa-Dios ri xojelesan-pe pan Egipto ri akuchi xqatej-wi poqon y xojxime' pa samaj.

Roma ri Jehová ri qa-Dios yixberuya' chupan jun jebelej ruwach'ulew, ri akuchi ek'o kokoj raqen taq ya', ek'o ralaxbel taq ya' y ek'o chuqa' ya' e rimil xabakuchi; ya' ri kan yebiyin chuwa taq taq'aj y kojol taq juyu'. Jun ruwach'ulew ri akuchi niwachin ri trigo, ri cebada, ri uva, ri wíkix, ri granada, ri olivo y ri kab ri nikiya' taq chikopi'. Chupan ri jun ruwach'ulew ri' maneq tijoj-poqonal y kan k'o-wi k'iy richin nitij. Chuqa' man jun ri man ta nik'ase' chiri' richin tijel y man jun ri man ta nilitej chiri' achi'el ri q'eqapueq y ri q'enq'oj-pueq.

Kan tibana' k'a ri nubij ri pixa' ri ninbij chiwe wakami, richin keri' kan xkixk'ase' utz y kan xkixwinaqir y kan xkixok-apo richin niwichinaj ri ruwach'ulew ri rusujun ri Jehová, ri xujikiba' chike ri qati't-qamama'.

Chupan ri kawineq juna' man xtziaqir ta ri qatziaq chiqij, y man xesipoj ta ri qaqen roma ri binen.

Ri Jehová xuben chiqe richin xojruk'uaj chupan ri nimalej tz'iran ruwach'ulew ri kan nak'en rukiy, ri nojineq rik'in kumatzi' y alacrán ri yekamisan, y akuchi janila xchaqi'j qachi' roma maneq ya'. Y rija' xuya' ri qaya' richin xqaqum ri xel-pe pa jun nimalej abej.