Popular Bible Verses from Deut 28

Share

Wi rix kan qitzij ninimaj ri rutzij ri Jehová ri qa-Dios y kan niben ronojel ri nubij ri rupixa' ri ninbij chiwe re q'ij re', rija' kan xkixrunimirisaj y kan xkixruya' pa kiwi' konojel tinamit richin chijun ri ruwach'ulew.

Y kan xtipe k'a ronojel re urtisanik re' pan iwi' rix, wi kan xtinimaj ri rutzij ri Jehová ri qa-Dios.

Y ri Jehová kan ja rix k'a ri xkixruya' pa nabey chikiwech konojel winaqi', y rix kan man jun ri xtik'oje' pan iwi', xaxe kan titaqej k'a ri pixa' ri ruya'on ri Jehová ri qa-Dios, ri ninbij chiwe wakami, kan tibana' k'a.

Kan xtuya' k'a ri beyomel chiwe y ri kaj kan xtijaqatej richin xtiqaqa-pe job pa ruq'ijul. Y ronojel ri isamaj kan utz xtuben chiwech. Y ri ch'aqa' chik ruwach'ulew xkeqajon iwik'in, jak'a rix kan man jun ri xtik'utuj ta pa qajik chike rije'.

Ri Jehová kan xtuben chi xkerujech pan iq'a' ri e etzelanel iwichin, y xke'animej-el chiwech.

Ri Jehová kan xtuben chi xtuya-pe urtisanik pa kiwi' ri iyakonabal richin ri jalajoj ruwech ixin, y chuqa' pa ruwi' ronojel ri xtiben, y xtuya' kikoten iwik'in chupan ri ruwach'ulew ri xtiberuya' chiwe.

Ri Jehová kan xtuben chi xtipe k'a urtisanik pan iwi', rik'in ronojel ri ye'iben.

Ri Jehová xtuben chi ronojel ri niben pa tinamit kan k'o urtisanik pa ruwi', keri' chuqa' pa ruwi' ronojel ri xtiben pa juyu'.

Ri Jehová xtuben chi xtik'oje' k'iy iwalk'ual, y kan utz xtel ri itiko'n, y kan xkek'iyer ta ri taq kal ri kokoj y nima'q taq iwawej.

Wi xtitaqej ri pixa' ri xuya' chiqe ri Jehová, y xkixbiyin chupan ri bey richin rija', kan xtuben k'a chiwe chi rix kan ix jun tinamit ri ruch'aron richin rija', achi'el ri rujikiban chiwe.

Ri Jehová kan xtuben chi kan xtuya' pa ruk'iyal ri iway.

Ri Jehová Dios kan xkixrurtisaj k'a, y xtuya' janila iwalk'ual, y ri iwawej kan janila xkek'iyer y ri itiko'n chuqa' janila xtiwachin achi'el xujikiba' chike ri qati't-qamama'.

K'ari' ri tinamit richin chijun ruwach'ulew xtiketamaj chi rix kan ix richin ri Jehová y xtikixibij-ki' chiwech.

Y man tijech'ej kan iwi' chire ronojel ri xinbij chiwe wakami y man ke'itzeqelibej ch'aqa' chik dios richin chi niya' kiq'ij.

Jak'a wi man xtinimaj ta rutzij ri Jehová ri qa-Dios y man xtitaqej ta ronojel ri rupixa' re ninbij chiwe re q'ij re', kan xtiqaqa pan iwi' ronojel itzel oyonik ri xtinbij chiwe.