Popular Bible Verses from Heb 11

Share

Jogaa'me jo'ne p'iida'a joñe'me Dios ja yoqolegue't da'me yacoteguet qomle ga'me jo'ne yeuatetedaque, qama'le yataqata yayate'n da'me eja da'me yauanalo qomle gaa'me jo'ne ja di'yo't. Nach'e naq'aete' ca'li dia'me jachiyoĝojoĝogueta jo'ne mach'e qadet'al: yataqata qoyiyamaĝade'n joca'li, yajouaĝat da'me p'iida'a joñe'me Dios.

Qalaĝaja gaa'me jo'ne qaya'te lepe'e' ja yaqanate't ta'le yiyamaĝade'n ñe'me Dios, qa'a gamachaqaega ga'me jo'ne jetaque yec'ata joñe'me, cha'li 'uaeñe youetaque da'me 'yamaqaten joñe'me da'me eja da'me 'uo, qama'le nataq'aen 'yamaqaten da'me ya'uo ga'me lomataĝanaĝa't gaa'me jo'ne yelotedaque.

Da'me yajouaĝat da'me 'uo da'me qadepe'e, male jayatenaq da'me eeta da'me qoye'et joca'li jena'me aleua. Qa'a ñe'me Dios ya'uo ga'me 'laqatac joca'li, qama'le yemta uo'oe gaa'me jo'ne qoyauanalo, da'me qoye'n chiyoqodayi joga'me ja qoyauana.

Ñe'me Abraham yataqata p'iya'a ñe'me Dios joca'li yiyaĝana, qama'le paja'a da'me yoqo'cha. Ec, dajoyi ga'me aleua jo'ne qoyanem qaedi en loĝot, qama'le ca'ae ga'me aleua jo'ne mach'e 'lachaqa', da'me ja yayaten ga'me dajoyi joca'li. Chane'eja, yajouaĝat da'me 'uo da'me lepe'e, Abraham nalegue ga'me aleua jo'ne qoyaloĝona ca'li, ena'am ta'le yaqa'a, qama'le netaue ga'me ch'e nepaqaliaĝala' joca'li, nataq'aen ñe'me c'oĝot Isaac choqoñe'me laual Jacob, jo'ne nach'enaua 'me joote yacoteguet da'me jo'ne Dios 'yaĝatema.

Ñe'me Noé yataqata p'iya'a ñe'me Dios joca'li 'uo da'me 'yaĝatem, queda'me uo'oe qomle jogaa'me jo'ne maliaĝa ja qoyauanalo. Qama'le Noé paja'a da'me yoqo'cha joca'li, ye'et jaga'me nelicota lat'edai, qaedi nec'alaĝatedegue gaa'me 'lachaqadiaĝa'u. Chane'eja da'me lepe'e ñe'me Noé, nach'eda jo'ne yaloĝon da'me qoya'uo ga'me ne'uaĝanague'j jogaa'me jiyaĝa'u jo'ne neteda'ña jena'me aleua. Qama'le chiyaqayi da'me lepe'e ñe'me Noé, nach'eñe yataqata qoyiyamaĝaden.

Ñe'me Henoc yataqata p'iya'a ñe'me Dios, qama'le qoyauegue di'me piyem joca'li, qoyachi qaedi ja yeleu. Chane'eja ua'a da'me ja yitaĝa qoyauana joca'li, qa'a Dios joote yachi joñe'me. Qama'le 'uo da'me 'naqatac jo'ne qoyediñe 'me eetac joca'li cha'li maliaĝa ja qoyachi ñe'me Henoc qama'le joote yiyamaĝaden ñe'me Dios.

Ñe'me Abel yataqata p'iya'a ñe'me Dios, qama'le ya'uo joca'li ga'me lajaqajec jo'ne onaĝaic 'me yanem joñe'me Dios, ga'me jo'ne napacalegue ga'me lajaqajec ñe'me Caín. Chane'eja nach'eñe ñe'me Abel jo'ne qoyiyamaĝaden ca'li, da'me qo'yaĝatetac da'me yataqatelegue, qama'le qoyaconeguet ga'me mach'e lajaqajec. Qama'le nayi, mate mane'e Abel joote yeleu joca'li, qalaĝaja da'me lepi'iyaĝac maliaĝa queta da'me qo'mi t'aqataĝatapema.

Nataq'aen jañe'me Sara yataqata p'iya'a ñe'me Dios, qama'le yaqanatet ta'le ya'uo lec'oĝot, mate mane'e te'me ja c'oe da'me joote 'yaĝaina' joca'li, qa'a male yauana da'me eja en yepaquichigui ñe'me Dios da'me jo'ne joote 'yaĝatem.

Qa'a ñe'me Abraham yeuate'ta joca'li da'me neta'ña ga'me noic let'adaic jo'ne qoyen chimaqachiñe jaga'me lamo da'me qo'noĝojeguem, ga'me noic jo'ne nach'eñe ñe'me Dios da'me 'noĝojeguem.

Ñe'me Moisés yataqata p'iya'a joñe'me Dios joca'li. Chane'eja ca'li male 'yaĝaic qama'le ja 'yamaqaten ta'le qoyetapega lec'oĝot jañe'me lec'oqote ñe'me Egipto laje'pi lejaliaĝane'j. Qama'le yelotelegue da'me taue da'me ne'uaĝanague'j joga'me Dios lec'oqo'tepi, ja jetaque da'me cha'li cada'ac da'me tauelo naa'me lamaico naa'me 'netaĝaloĝoco. Qama'le en lelnataĝac da'me jetaque yaconeguet da'me lachoĝodec jo'ne ena'am da'me jo'ne yachalegue ñe'me Dios liquiyac, da'me jo'ne eetapega yaguegue joda'me lajo'viyaĝac, ja ena'am da'me namaic jo'ne leuoyaĝac di'me Egipto, qa'a joote yelotapega da'me mach'e nejetenaguec jo'ne chiyoqo'ot qomle ñe'me Dios. Ñe'me Moisés, da'me yajouaĝat da'me 'uo da'me lepe'e, qama'le ca'e di'me Egipto. Ja t'oiyapega da'me lalemataic ñe'me nejaliaĝanec, qama'le 'nañaĝatec da'me mach'e lelnataĝac jo'ne chimaqachiñe, qa'a ena'am ta'le joote yauana ñe'me Dios jo'ne ja di'yoq.

Ñe'me Abraham yataqata eja da'me p'iya'a ñe'me Dios, qama'le yacona ñe'me lec'oĝot Isaac qaedi en lajaqajec ca'li Dios ya'uo da'me yapiyenec, qama'le qaya'te ta'le yaqalatapega da'me en lajaqajec ñe'me onolec jo'ne mach'e lec'oĝot, mate mane'e da'me 'uo ca'li da'me 'laqatac ñe'me Dios

Jañe'me Rahab jo'ne quejeguetaĝai yataqata p'iya'a joñe'me Dios joca'li, qama'le ja ueta'ñoto dia'me loeco lo'olpi da'me qoyala't ca'li, qa'a jañe'me nach'añe jo'ne yaconegueta joca'li jogaa'me lec'atenaĝanaĝanaqa ñe'me Josué, yataqata yiyamaĝate'tape jogaa'me.

Joga'me Israel laje' yataqata p'iida'a joñe'me Dios joca'li, qama'le yañoĝo't da'me paideta ga'me noĝop let'adaic jo'ne lenaĝat da'me Tomaĝadaic, da'me pedelegue ga'me aleua jo'ne qaqatelegue. Chane'eja joca'li yem, qama'le joga'me Egipto laje' te'me jetaque naq'aeta da'me yauote, qalaĝaja ouaĝayaqa.

Yajouaĝat da'me lepe'e' joga'me Israel laje' qama'le quetedapejop di'me noic let'adaic jo'ne Jericó nalo'taguet siete jaa'me noloqo'ote. Ca'li yem qama'le paja'a da'me 'uaĝadiñe gaa'me lequepaĝanaqa'te di'me noic.

Yataqata p'iya'a joca'li joñe'me Dios, qama'le uenate'ta da'me ya'uo ga'me nemaĝac jo'ne Pascua. Nach'e ena'am da'me damaĝajoĝolegue ca'li da'me qo'yameneque jaga'me 'naĝanaĝate letauo' jogaa'me najo'mi, qaedi ñe'me piyem le'ec jo'ne yalate'tape ca'li ga'me nepiloĝotpi male qaya'te 'uo ga'me 'yeteque ga'me lec'oqo'tepi' ga'me Israel laje'.

Ñe'me José yataqata p'iya'a joñe'me Dios joca'li. Chane'eja joca'li jetaque yeleu, qama'le 'yaĝatema ga'me Israel lec'oqo'tepi da'me 'uo qomle ga'me nolo' da'me queda'ae di'me aleua jo'ne Egipto, qama'le yepotan da'me 'laqatac qaedi 'uo da'me qo'yeteque qomle jogaa'me p'inaqa.

Ñe'me Jacob yataqata p'iya'a joñe'me Dios joca'li. Chane'eja joca'li jetaque yeleu, qama'le 'yaĝatema da'me lichoĝodenataĝanaĝac jo'ne yanema onolqa'tape jogaa'me lec'oqo'te ñe'me José, qama'le 'nonaĝachichigui joñe'me Dios joca'li da'me uajeletalegue ga'me laje'l.

Ñe'me Isaac yataqata p'iya'a joñe'me Dios joca'li, qama'le 'uo da'me lichoĝodenataĝanaĝac jo'ne 'yaĝatema ñaa'me Jacob nataq'aen ñe'me Esaú qaedi nach'e eta't da'me Dios ue'tajopa.